Aizawl: Kar kalta Inrinni (14.10.2017) zinga an huan Kawrthah thlama thia chhar Hmingchungnunga (64) leh a nupui Rozikpuii (56), Ramhlun South te thattu an fapa Lalnunmawia (31) chu Police ten manin Mamit jail-ah dah a ni. Mamit SP Naryan Thapa hnen atanga Zalen thudawn danin an huan vau-a t-shirt thisen kai an hmuh chu Lalnunmawia kawr a ni tih an finfiah hnuah amah hi thu zawt fiahin a inpuang a. A nu leh pa hi zan dar 9 velah ko thovin a pain kawngka a rawn hawn chu thingfakin a vua a, a nu pawh bei chhunzawmin chem hmangin a sat leh niin a sawi. Police ten an chhuina kal zelah Lalnunmawia pawisa lak atangin eng emaw zat chu hemi zana a kekawr hak atangin an hmu let leh a ni.