Aizawl: MPCC Media Chairman Lallianchhunga chuan, “Kumin 2018 Election-ah Congress Party kan sawrkar leh dawn a, tualto (regional) party tla tawh ding chhuak leh an la awm lo a ni,” a ti.   Nimin khan Aizawl Press Club-ah chanchinbumite kawmin MPCC Media chairman Lallianchhunga chuan MNF party an la sawrkar dawn loh thu sawiin MNF President chuan mipui rin a hlawh lo nia sawiin a thusawi pawh mipui ten nuihzat ah an la tlat zel niin a sawi a. “MNF Party innghahna chu Mizoram Political history-ah term 2 bak sawrkar zawn an la awm lo tih hi a ni mai a; Mizoram-a history siam tawh thin Congress Party bawkin a zawnin a vawi-3 nan sawrkarna a siam leh dawn,” a ti.   MNF-ten development ah sawi tur an nei lo nia sawiin, “Kawlphetha siam lamah uchuak taka compensation lak a nih avangin Tuirial HEP a pamtul hial a, Falkawn-a Referral Hospital tura ruahman chu Ar In-ah an chhuah a, Congress chuan Medical College changtlung tak MIMER-ah an chhuah thung a ni,” a ti bawk.   MPCC Media chairman chuan MNF te chu hel rim an la nam reng nia sawiin, “MNF kum 10 an sawrkar chhung khan hmun hrang hrangah helhoten bu an khuar a. Tun hnaia Central YMA-in political party hrang hrang te a kawmnaah pawh political party-te zinga hel chungchang an sawipui awm chhun chu MNF hi a ni,” tiin a sawi bawk.