ZALEN February 26, 2026 : State Election Commissioner Dr H Lalthangliana chuan tuang tichhahin Aizawl Municipal Corporation (AMC) inthlanpui chu an sawn hla tih sawiin, State Election Commission (SEC) hian sorkar leh political party ngaihdana kal a ba lo tih a sawi.

AMC inthlanpui lo awm tura atan Ningani khan Municipal Returning Officer (MRO), Asst. MRO, Election Officer leh Nodal Officer te tan State Election Commission, Mizoram chuan ni khat awh Training chu Aizawl DC Pisapui Hall-ah a buatsaih a. State Election Commissioner Dr. H. Lalthangliana chuan, SEC, Mizoram hi Mizoram sorkar hnuaia function a ni lo va, political party thuhnuaia awm an ni hek lo tih sawiin, "Inthlan chungchangah chuan political party te chu SEC thuhnuaia awm an ni zawk," a ti.

Dr H Lalthangliana chuan AMC inthlanpui leh Budget session awm bichilh lutuk thin chu hmalam hun lokal zel tur atana siam rem \hain a hriat a, tuang tichhahin AMC inthlanpui chu a sawn hla mai tih sawiin, "SEC chuan political party te hnenah a \ul chuan thurawn te pawh a la ang. Mahse, SEC chuan \ha ber tura a hriat angin a kal mai, chu chu SEC inngahna principle a ni," tiin, SEC hian sorkar leh political party ngaihdana kal a ba lo tih a sawi.

Dr H Lalthangliana chuan, sorkar hnathawk tan chuan sorkarna fawng chelhtu tur te thlanna tur thil a nih avangin, election hi a sorkar hna hliah hliah a, election lai chuan election duty tluka hna ngaih pawimawh tur a awm lo tih a sawi a. SEC-in Election official tura appointment order a chhuah tawh chuan sorkar hnathawkte hi SEC hnuaia awm an ni tawh tih a sawi bawk.