Khawvel mak tih takin chet chhiatpuitu nia lang lem lo an coach an bân a, Tomas Tuchel an la lut zui a. Hemi hnu hian Bayern Munich chu an boss thar kaihhruaina hnuaiah a tlak theihna apiang atangin an tla a tih theih titih tlat mai.

Inrinni zan khan Bundesliga-ah Mainz tlawhin 3-1 zetin an tlawm haw a, an hnu lawka inkhelah an hnuai chiaha awm, Borussia Dortmund chuan si li faiin Frankfurt an hneh zui ta si a, league-a hmahruaitu an nihna hlohvin point khatin an phak ta rih lo.

League-a hmahruaitu nihna an hloh hma hian Thawhlehni zan khan Manchester City lakah Uefa Champions League quarterfinal atanga hnawh chhuah an ni tawh a. Hemi hma hian German Cup (DFB Pokal) quarterfinal-ah Freiburg hneh lovin an tla tawh bawk a, Tuchel-a hnuaiah a hniam zawngin an kal tih theih a ni mek.

Bavarians hian Julian Nagelsmann bâna Tuchel-a an rawih hnuah vawi sarih khel tawhin vawi thum an tlawm tawh a, an manager hmasa chiahin khelh 37-a a tlawmpui zat an tlawm der tawh a. An inkhelh hnuhnung vawi li-ah chak an nei miah lo bawk.

Mainz an hneh loh hnuah coach chuan an team chu tun season-a vawi 70/80 vel inkhel tawh ang maia an zawi thu a sawi a, “Ke chau tak angin kan awm a, khelmual luh apianga extra time khel ziah ang maiin kan inlan a ni,” a ti.

Tuchel-a leh a team hian tunah chuan Bundesliga chiah nomawi beisei an nei tawh a, chutah lah khelh sarih la awmah hma an hruai phak lo rih mek.