Aizawl; Mizoram Pollution Control Board (MPCB) hmalakna in Mizoram hmun hrang hrangah tui thianghlim leh thianghlim loh endikna hmun 50 din a ni dawn. Mizoram Pollution Control Board (MPCB) hotute hnen atanga Zalen thudawn danin tun dinhmunah tui endikna hi hmun 6-Tlawng leh Tuirial ah hmun 2 ve ve bakah Mission Vengthlang leh Ramhlun North a tuikhur 1 ve ve endik a ni a, hei hi duhkhawp a nihloh avangin Central ah dilbelh a ni a, tui endikna tur hmun 50 dang neih belh leh remtih a ni. Ruahman dan chuan tui endikna hi Aizawl district ah 25, Lung lei district ah 6, Lawngtlai, Saiha, Mamit, Serchhip leh Champhai district ah 3 theuh leh Kolasib district ah 4 dah tum a ni a. Lui tui, tuikhur, dil, handpump leh endik ngai nia hriat te endik thin an ni dawn a ni. Mizoram Pollution Control Board (MPCB) Member Secretary Er. C.Lalduhawma chuan mipui ten tui intur thianghlim an hriat leh hriatloh enfiah chu an tum ber a ni tih a sawi a, " Kan test thin ang a, mipuite tan a thianghlim tawklo anih chuan a chhan kan zawng a, sawrkar ah rawtna kan thlen thin dawn a ni," tiin Zalen palai a hrilh a ni.