Aizawl: Tunhnai ruahsur nasa avangin Mizoram hmun thenkhatah harsatnaa thleng a, Darzokai ah in pakhat lain Tippereghat-ah chênna in 20 chu tuiin a chim a, Tlabungah pawh an buai hle. Darzokaia tui lianin a lak hi hmeithai, Zokhumi In a ni a, bungrua pawimawhte erawh mi tlawmngai ten an senghawi hman. Tuilian hian in 2 dang pawh a chim leh mai a hlauhawm avangin in neitute hi Community hall ah awm lailawk tir an ni. Chhimtuipui tuilian vang hian Hnahthial SDM chuan kea kalna leiah mipui kal kai a khap a, mahse nimin lamah tui hi a kam tak deuh avangin khapna hi a sut leh a ni. Tuilian hian Tippereghat ah chênna in 20 vel a chîm a, in 60 bawr vel chu tui chîm hlauhthawnawmin a awm a, chhungkaw 130 leilet pawh tuiin a chîm chhe hneh hle niin thudawn a ni. Myanmar-a Zohnahthlakte chenna Kanan, Khampat, Tahan te chu han lova ruah a sur rei tawh avangin an buai a, sawrkarin tui lian tuar te chu chhanchhuak turin a bei mek niin kan thudawnna chuan a sawi.