ZALEN March 8, 2026: Aizawl khawpui chawmtu, Tlawng tui chu tlem deuh tawh mah se Public Health Engineering (PHE) department chuan tui sem kawngah harsatna an la tawk lo.

ZALEN-in PHE thawktute hnen atanga thu a dawn danin Tlawng tui hi tlem chuan a tlem ve sawt tawh tawh nain tui chu dan pangngaiin an la sem reng thei tih an sawi a. “Thla khatah vawi thum, ni 10 danah tui hi kan ruahman angin kan la sem thei a. Hmun thenkhatah chuan hei aia zing hian kan sem thei nain mipuiah inthikna a awm theih vangin ni 10 danah kan la sem hrih a ni,” tiin PHE officer pakhat chuan a sawi.

Tui hi Aizawlah hnianghnar taka sem tur chuan ni tin litre maktaduai 40 vel pump chhuah a ngai a; mahse, tun dinhmunah ni khatah litre maktaduai 35 velte an pump thin a. Heti chung hian harsatna lutuk awm lovin mipui hnenah tui hi sem zel a ni tih PHE thawktute chuan an sawi.

Hetih lai hian chhim phei lam hmun thenkhat chu pipe siam mek vangin hnianghnarin tui hi pek theih a ni hrih lo thung.

Aizawl khawpui chawm tur hian Tlawng atangin tui hi pump niin phase I leh II hian ni khatah tui mld 29 vel a pump thei a. Phase III (Setlak hmuna awm) hian mld 37 vel a pump thei bawk a; mahse, dan tlangpuiin phase III atang hian ni khatah mld 10 vel pump thin a ni.

Chhinchhiahna hnuhnung berah Aizawl khawpui chhungah tui connection 88,203 a awm mek.