Aizawl: Mizorama tui in tur siamtu company 4 te Food Safety & Standards Act, 2006 endikna an paltlang zawh loh avanga Food Safety Authority of Mizoramin tui siam chhuah hna an chawlhtir chu an la chawl reng niin thuneitute chuan Zalen an hrilh a, a dang pathum Kingfisher, Bisleri leh Rio pawh standard an pha lo tih hmuhchhuah belh leh a ni. Food and Drug hotute chuan company pali te hian tui siam chhuah hna hi an la thawk thei lo vek niin an sawi a, “Chhunzawm tura thu pek tumah an la awm lo,” tiin an sawi. " Hetih lai hian company 4 zinga pakhat Amawii chuan sorkarin sample an laksak leh hnuah thla hnih lai an nghak tawh niin an sawi a, thupek zawmin tui in tur siam chhuah hna an chawlhsan a, hralh chhuah tawh pawh an la kir vek niin an sawi bawk. Zo Aqua pawhin siamchhuak lo tura an tih hun chhung chu liam tawh mah se siam leh tura thupek an chhuah loh avangin an la siam lo niin Zalen an hrilh a, an tui sample pawh an thawn leh tawh niin an sawi bawk. August 18, 2017 khan Health & Family Welfare Department (H&FW) hnuaia Food Safety Commissioner chuan tui siam chhuah hna chawlhsan tura hriattirna hi a lo chhuah tawh a ni.