October 16, 2023; Inrinni 14.10.23 tlai lama Tuipuiferry a vanduaina tawk Tv. V. Daniel Lalrinchhana (32) ruang chu tukin dar 8:30 bawr vel khan hmuh a ni.

Tunkar Inrinni a Tuipuiferry a thian zaho a intihlim tura kal zinga mi pahnih, Tv. Lalchharliana leh Tv. V. Daniel Lalrinchhana, Lawngtlai Vengpui te chu vanduaithlak takin Tuipuiferry khaw bula khawl hmanga tiau lakna-ah an chesual a. Lalchharliana zawk hi chhan hman niin a thianpa, Tv. Daniel V. Lalrinchhana erawh chhan hman lohin tuipuiah hian a tla hlum ta a ni.

Chetsual tawh atang hian Tuipuiferry khua bakah Central YLA, MTP leh Lawngtlai leh Siaha atangin mi tlawmngai ten chhun leh zan zawmin ruang zawn hna hi ngawrh takin an thawk nghal a. Tuipui hi ala len em avangin ruang zawn hnathawh a chak thei lova. Chuti chung chuan Tlawmngai Pawl leh mi thahnemngai ten theihtawp chhuaha Ruang zawn hna an thawh hnu-ah tukin zing dar 8:30 vel khan Daniel-a ruang hi a tlakna atanga hla tak, Bukpui lui chhuahah hmuh a ni ta a ni.

MTP ten tlawmngaia ruang zawn atanga ruang hmuh leh lakchhuah dan tur chungchanga ruahmanna fel tak an siam chu Central YLA chuan lawmawm an ti takzet a ni an ti a, vanduaina thlen tirh atanga Lawngtlai Branch hrang hrang te inpekna zawng zawngah lawmthu an sawi bawk.

Ruang zawngtute leh vanduaina tawk chhungte tanpui leh chhawmdawl kawnga ram hruaitu leh khawtlang nu leh pate thilpek tam tak petute chungah pawh CYLA chuan lawmthu a sawi a, a bik takin heti ang a Tuipuiferry khaw bulhnaia vanduaina a thlen changa theihtawp chhuah a lo buaipui thintu, Tuipuiferry khawtlang mipui te leh khawtlang hruaitute chungah pawh lawmthu an sawi bawk.