ZALEN, September 11, 2025: Mizorama tuialhthei zuartu pawl, All Mizoram Petroleum Dealers’ Association (AMPEDA) chuan Inrinnia hawn tur, Bairabi leh Sairang inkar rel tlan behchhana rela phurh luh tuialhthei dah khawlna, rail-fed oil depot dinna tur hma laksak turin prime minister an ngen.

AMPEDA hian Nilaini khan Prime Minister Narendra Modi hnenah hian lehkha thawnin Mizorama rail-fed oil depot neih thuai a tul dan leh hmalakpui tura ngenna hi an thlen.

Tuialhthei hi Mizoram hian state pawna depot atanga kawngpuiah vek phurh a nih thu leh hei hian harsatna tam tak a thlen tih an sawi a. Tlakchham a awm a, phurh man a sang a, a muang a, sik leh sa leh ram hmelhmangin a zir loh avanga harsatna thleng thei tam tak a awm bawk tih an tar lang.

Bairabi-Sairang relkawng hawn tura inkalpawhna awlsam phah tur thlirin Mizorama rail-fed oil depot din vat a remtih theih nana ngenin hma lakpui turin Modi-a hi an ngen ni.

AMPEDA hian an lehkhaah hian prime minister chu India hmarchhak, a bikin Mizoram hmasawnna tura hmalak zelna kawnga a thawh avangin lawmthu an hrilh bawk. 

Bairabi-Sairang relkawng hi Modi-a hian Inrinni hian Aizawla Lammual atangin a hawng dawn a ni.