Aizawl: Aizawl DC chuan Salem veng leh Republic inrina, Lungli lui a tuibur thlawr thin te chu titawp turin a hriattir a, DC thupek hi mi thenkhat chuan an la zawm lo. Zalen palai thudawn danin Lungli lui ah hian tuibur factory nei mi 5 an awm a, heng factory hian mipui vantlang hriselna a tichhia nia hriain Mizoram Pollution Control Board (MPCB), Mizoram State Tobacco Control Society (MSTCS), Salem veng Local Council leh a bul hnaia zirna in te chuan titawp turin an lo ngen tawh a. Anni bakah hian Assembly Committee peng pakhat Subject Committee II pawhin a hmunah an lo tlawh tawh bawk a ni. Mahse tihtawp anih tak loh avangin Aizawl DC chuan titawp turin hriattirna a pe a, mahse tuibur thlawrtute hian eizawnna dang an neihloh thu leh zangnadawmna pe turin an phut a, mahse DC lam hian hetiang engmah an pe theilo a ni tiin an chhang thung. DC thupek bawhzuiin ni 9.1.2017 (Thawhtanni) khan Kulikawn Police te chu tui bur thlawrna hmunah hian kalin titawp tura an hriattir bakah tihtawp anih thu lehkha an tar a, DC thupek chu zawm a nihloh chuan a tul anga action lak anih tur thu pawh an hriattir a ni. Hetih lai hian tuibur thlawr zingah titawp an awm rualin la chhunzawm pawh an la awm tho niin Salem veng Local Council chairman chuan Zalen a hrilh. Lungli lui ah hian tuibur factory 5 vel an awm a, Aizawl khawpui chhung hmun dangah chuan mipui tana hnawksak khawp factory dang hi a awm hriat a ni lo.