Zothan Autoworks Pro Volleyball League 2022, R. Dengthuama Indoor Stadium, Mualpuia neih mekah May ni 7 Inrinni zan khan Hunthar leh Tuichangral te inkhelin Hunthar chuan Tuichangral lakah 25-19, 20-25, 25-23, 18-25, 15-6 (3-2) in hnehna an chang.

Team pahnih an inchet that chhawkna karah Hunthar an fei zawk a, inrinni zan Zothan Autoworks Pro Volleyball League-ah set thum set hnihin Tuichangral an hneh. Vawi hnih champion tawh Huntharin inkhel thunun zo bik lo mah se hneh takin set hnuhnung ber an awpbet a, 25-19, 20-25, 25-23, 18-25, 15-6-in Tuichangral lakah an chak.

Hunthar-in mar tha taka khelh an harsat viau na a, hmahruaitu zawkah tang zelin a tawpah player inkhairual leh tawn hriat nei zawk an nihna an chhawr a, hnehna changin championship bul an tan thei.

Set nganaah Laldensanga'n team fuih phurin lehlam an zuih ve thung a; a pum puiah Densanga point 15 hmuin vawi thum a tisual a, Gagan Kumar chuan point 30 thawk chhuakin 12 a hloh a, Hunthar tana hmu tam ber a ni.

A tirah Tuichangral chiaiin huhang nei lian zawk Hunthar-in harsa lo takin set an la. Set hnihnaah khaw chhak team insiam thain hlawk takin Services player Sahil Kumar a inlan a, inkhel boruak an thlak thleng.

Mahse, set thumnaah Hunthar intuai tharin fuh takin bul an tan a, 7-0-in hma an hruai. Sahil chuan Tuichangral chawi kang ve lehin a vuak tlak bakah a awlah a dah ṭha thei hle a, 19-17-in hma an hruai let.

Boruak sangah Densanga'n rin tlakin a khel a, tha taka a hlap tlak hnuah hma lam panin 24-21-in Hunthar an sang. Tuichangral-in point hnih hmu zawnin an hnaih hman a, Gagan chuan set hnih set khata hma an hruai nan a hlap a, net bulah Sahil chuan dan thlak tum viau mah se ball a per chhuak.

Hunthar an tlo rei thei bik chuang lo va, Saidingpuia'n hriat hlawh thamin Tuichangral tan a theihna a lantir a, sang taka zuangin tha takin a vaw fo. Set linaah Saitea hian rin a hlawh a, Hunthar khin phak lohin team a tlangpui.

Set hnih ve ve an lak hnuah Hunthar-in paukhauh zawk an nihna an lantir ve thung a; set hnuhnung ber an tan rualin Tuichangral-in an dinhmun an hloh a, 4-0 a nih hnuah 9-2, chumi hnuah 13-4-in Aizawl team-in hma an hruai fal.

Captain leh setter Remsangzuala'n vaw tlain hnehna an sual chhuak a. Hunthar tan rinrawl Gagan leh Densanga bakah an inkhelh chhungin Lalramnunfela'n point 11 hmuin point li chiah a paih a ni.

Mi malin Tuichangral spiker Sahil-an point a hmu hnem ber a, 44 thawk chhuakin 16 a hloh a, D3 Business Player of the Night lawmman a dawng. A kawppui Saitea'n vawi 17 hlap thlain point li a hloh a, team chakpui zo lo mah se Pro Volleyball star thar a inlar.

Huntharin nilaini zanah Durtlang North an khelhpui leh dawn a, team pahnihin tha takin league bul an tan ve ve a, chak zawn zawk nih tumin an innuai ang.

Ningani zanah Tuichangral-in a vawi hnih nan an khel ve thung ang a, an tlawmna chhang let nghal tumin TNT an hmachhawn dawn a ni.

D3 Business Player of the Night
- Sahil Kumar (Tuichangral)

Play stats :

Hunthar

Gagan Kumar : point hmuh 30, point hloh 12
Laldensanga : point hmuh 15, point hloh 3
Lalramnunfela : point hmuh 11, point hloh 4
Zomuansanga : point hmuh 8, point hloh 6

Tuichangral

Sahil Kumar : point hmuh 44, point hloh 16
Saidingpuia : point hmuh 17, point hloh 4
Malsawmtluanga : point hmuh 4, point hloh 3
F Lalngilneia : point hmuh 3, point hloh 4

Inkhel leh turte :

May 09, Thawhtanni - 8PM :
Chhinga Veng Spikers v TNT (mipa)

May 10, Thawhlehni -
3pm : Durtlang v Kanan (hmeichhia)
8pm : Bungkawn v Bethlehem Vengthlang (hmeichhia)