March 27, 2023; Vawiin chawhma lam dar 10:30 vel khan Lawngtlai district chhung, Vaseikai leh Longpuighat inkara Tuichawng Lei chu HYVA truck ritphurin a zawhlaiin a chim a, mi pahnihin hliam an tuar.

Vaseikai police station atanga ZALEN thu dawn danin, truck hian kawng siamna a hman tur lunghersawm (GSB) a phur a, Lei lai vel a thlenin Lei hian zo lovin a chim.

He truck, HYVA RJ 19GG 6135 hi GREF company ta niin, driver Darshan Nagi (41) s/o Dakhiram, Orissa chuan hliam a tuar a, a malpui ruh a tliak nia hriat niin, VIJ Engineering Company, nikum a leichim thiah hna thawk labour pakhat Shaikh Farid (24) s/o Shirajul, Assam pawh Lei chim ah hian tla telin an pahnihin Lawngtlai District Hospital panpui an ni a, ngaihtuahawm an ni lo nia thudawn a ni.

Nikum April ni 6, tlai  5:30 vel khan tun a lei chim thlakna tur atana Lei dawh lai chu a lo chim tawh a, hnathawktu hnamdang 5 ten hliam an tuar a, mi pakhak Hasar Ali (25) s/o Achar Uddin, Assam lam mi chuan nunna a chan nghe nghe a ni.