Aizawl February 23, 2024 : BJP Mizoram chuan vawiin khan BJP State Office, Mipui Run, Upper Republic-ah Friday Political Session an nei a, State President Vanlalhmuaka chuan thu a sawi a, Assembly Speaker hlui Lalrinliana Sailo chuan BJP National Convention neih zawh tak chungchang report a pe bawk.

Vanlalhmuaka chuan, "State dang ina an State tana Politics an khelhna hmanrua te hi keini Mizoram mipuite hian kan lo buaipui ve fo hi a fuh lovin, kan tan tangkaina a awm lo a ni. Mizoram chuan Mizoram Politics buaipui ila, kan State-ah Development tak tak kan thlentir theihna tur awm chhun chu BJP Central-a sawrkar mek leh sawrkar leh ngei tur hi a ni," a ti.

Hmuaka chuan, "Mizorama sawrkarna chelh tawh leh chelh mek CM leh Minister te central ah an kal ve ta zeuh zeuh a, nimahsela thil tak tak Mizoram tan an la rawn hawn awm kan hre miah lo. An thusawi tam tak te pawh an kal nawn leh chuan an rawn thak leh thin a, chuvangin Mizoram-a sawrkar mek hian Mizoram mamawh tak tak hi sawrkar tawh te ang tho khan an la rawn hawn thei bik lo niin a lang a ni. Mizoram chu tuihna awmlohna lam hlir ah kan tlan a, state dang chuan tuihna awmna lam an hria a, an state ah pawh nasa takin development a thleng," a ti.

BJP Mizoram President chuan, "Hetiang dinhmun hi keini pawh hian kan chan ve theih a ni. BJP Mizoram-in MLA Election Manifesto 2023 a kan neih te hi BJP auhla a la ni reng a, dentral BJP te nena kan duan ho a nih avangin kan Manifesto hmang hian Mizoram mipui mamawh sector hrang hranga Central-in sum min dah sak te chu BJP kaltlang chuan tihhlawhtlin har lo te a ni a, nimahsela kan thuziak ang chiah pawh hi Party dang tan chuan tih theih a ni chuang lo. Chuvangin BJP pawimawhna hi kan hriat hunah development kan beisei hi kan hmu dawn a ni," a ti bawk.

BJP Mizoram Core Group Member Lalrinliana Sailo chuan BJP National Convention, February 17&18, 2024 a neih zawh tak chungchang report pein, "BJP-in a tak taka ram an vei zia a lang chiang hle a, India ram inthlanpui lo awm leh turah BJP chuan MP 400 chuang nei tura hma lak mek a nih avangin, Mizoram-ah pawh BJP MP kan neih chuan central blessing, malsawmna kan dawng ve thei dawn a ni tih hriat a ngai a ni," a ti.