Mizoram Super League,  Season 7, R. Dengthuama Indoor Stadium-a khelh mekah zirtawpni zan khan veng inthenawm pahnih Khatla TBL leh Tuikual South inhmachhawnin point thumin Tuikual South an chak lo. 

Zalen palai zawhna chhangin Tuikual South manager Lalchungnunga chuan,”A khelhah kan inhnehtawk a, hun tawpah point 3-in kan chak lo kha kan vanduai vang a ni. Zan dang angin free throw lut thei ngat ila, result a danglam ngei ang. Next match atang chuan hrem vanga khel thei lo Fakmawia a rawn khel thei tawh dawn a, kan danglam tawh ang, Tin, game 7 zet khelh tur kan la nei a, semi-fnal chu kan luh ngei ka beisei,” a ti.   

Zirtawpni zan inkhel hmuhnawm takah hian team hnihte hi an inbei tawk hle a, mahse zan dang zawng aiin point score an harsat emaw chu tih turin hun tawp hamrik a rikah TBL lam hian 75-72 in hnehna an chang thei hram a ni. MSL Champion hlui Khatla TBL hian match thum khel tawhin match 2 an chak tawh a,  vawi 1 hloh tawhin point nga an nei mek. Tuikual South lam pawh hian match 3 tho khel tawhin tum hnih vanduaiin vawi 1 an chak ve tawh a,  point 3 an nei mek.

Khatla TBL lam hian an state pawn player bakah foreigner an chhawr theih laiin Tuikual South lam state pawn player hi ala rawn thlen loh bakah an player tha Fakmawia chuan hrem tawkin he inkhelhah hian a inlan thei lo. Khatla tan K. Lalthianghlima a chetha hle a, point 28 a thun. An foreigner Levi Bradley Jr. chuan point 18 a thawkchhuak a, point 10 score tu Lalliansanga Sailo pawh a khel chhe hran lo. 
    Tuikual South tan an foreign player Darrell Bowie leh tualchhung player Lalnunpuia ten an thawhhlawk a, point 19 ve ve an thawkchhuak bakah Dennis Lalmuanpuia’n point 13 a thehlut ve bawk. 

Team hnih tan hian an foreigner ten inkhelh bul an tan ve ve a, an palen leh tharum ngahtuahin an khel tha tawk lo ve ve. TBL  tan tualchhung player pahnih K Lalthianghlima leh Lalliansanga ten an thawhhlawk a, Tuikual South tan pawh Lalnunpuia leh Dennis Lalmuanpuia ten inkhelh an siam hle bawk. 

Inkhelh a hmuhnawmin team hnih te an inhnehtawk bawk a, entu mipui lam pawh an tang hle tih a hriat. Inkhelh bul tan phat atangin game a tang nghal a, bul tan tha zawk Tuikual South lamin 23-19 in quarter khatna an la. Khatla TBL player te an la insiam rem hman lo deuh a ang. 

Second quarter tan a ni a, quarter hmasa aiin player ten point score an harsat a, Khatla TBL lam rawn chetha zawkin 19-14 in hnehna an chang let ve thung. He quarter-ah hian Tuikual lamah chetha fal an awm hran lo va, Khatla lamah erawh K Lalthianghlima leh Levi Bradley Jr te inkawpin an thawhhlawk hle thung. 

Quarter thumnaah Tuikual South lam rawn tang chho ve lehin an forign player Darrell Bowie chuan a thawh hlawk hle a, tualchhung player F Zodinthara’n a thlawp tha bawk nen 20-19 in hnehna an chang let ve leh. Fans lam an phur a,  hall chhung thawm pawh a tha ham ham hle. Khatla TBL lamin state pawn player Punjabi palian Arvindar Singh an chhawr a, beisei erawh a phak rih lo. 

Fourth quarter-ah hian team hnih te point hmuh a inthlauh loh avangin player ten chak zawk nih an tum ruh a, inkhel pawh a tir atangin a thang nghal hle. Team hnih te an innawr tawn zak zak a, point lamah pawh an inhnehtawk chho hle a, mahse point score erawh an harsat dun hle thung. Huntawp dawn minute 2 chiah a awm tawh tihin Khatla TBL lam chuan point 2-in hma anhruai a, Tuikual South lamin tan khawh lehin an umphak ve leh a, hnehna chang zawk tur hriatthiam a har. Tuikual South vanduaina turin huntawp dawn second 26 chiah a awm tihin Khatla TBL lamin freethrow a hlawhchhuak hlauh a, hetih lai hian point chu 72-71 a ni mek. TBL Michael Liansanga’n freethrow a hmang tangkai a, point a score. Tuikual South lam hian lehthalna hun tha nei leh mah se an vanduaina a kal tluang a, an huntha an hmang tangkai thei lo. Hun tawp hamrik a rik meuh chuan Khatla TBL lam chu point 3-a hmahruaiin 75-72 in an vannei ta zawk a ni. 
              1st qtr 2nd qtr 3rd qtr 4th qtr
TBL :         19         19          19         18
TKS :         23         14           20        15

Khatla TBL
K. Lalthianghlima - 28 pts - 9 rebounds - 3 assist - 1 steals.
Levi Bradley Jr. - 18 pts - - 8 rebound - 2 assists.Lalliansanga - 10 pts - 11 rebound - 8 assists - 21steal.
Tuikual South BC
Darrell Bowie - 19 pts - 12 rebounds - 7 assists - 5 steals.
Lalnunpuia - 19 pts - 4 rebounds - 3 assist - 2 steals
Dennis Lalmuanpuia - 13 pts - 6 rebounds - 2 assists - 3 steal.