Aizawl: Tuikual South khawtlang chuan nimin Inrinni khan an veng kum 30 tlin “Pearl jubilee” chu Lal Thanhawla auditorium-ah an lawm a, tlaiah jubilee lawmnan khawtlang huapin ruai an theh. Nimin jubilee lawmna hun hi Chalrosanga, Organising Committee chairman-in a kaihruai a, khuallian PHE Minister Zodintluanga chuan, “Tuikual khawtlang inlungrualna avangin Tuikual in nasa takin hma a sawn a, hei hi hruaitu hmasate vision neih that vang a ni,” a ti. Zodintluanga chuan UT building thin chu mipui tan tangkai zawka hman tum a ni tih a sawi bawk. Khual zahawm bialtu MLA Lalruatkima pawhin Tuikual khawtlang tanrualna fakawm a tih thu a sawi a. “Tunlaiah insawisel kan uar ta lutuk hi a pawi a, insawisel lovin kan thatna lama infak thiam kan zir a ngai a ni,” a ti bawk. Tuikual South khawtlang hian ni 10.7.2017 (Thawhtanni) atang khan jubilee hi lawm tanin Thawhtanni khan Jubilee lungphun hawnna leh souvenir tlangzarhna an nei a. Thawhlehni khan jubilee puala in sak thar chu hawn a nih bakah a thlawna inentirna ‘free clinic’ neih a ni a. Nilaini khan chhungkaw pual hun hman a niin Ninganiah ‘Hlim zan’ hman a ni a, Zirtawp zan khan concert neih a ni bawk. Tuikual veng hi kum 1963 khan Dawrpui veng atangin an indang a, kum 1987 khan North leh South-ah inthenin kum 1989-ah YMA an indang a ni.