Nizan khan Mizoram Super League-ah match hnih awmin, inkhelh hmasa zawkah Zarkawt BCA-in Mission Veng Hotshots 91-83 in an hneh a, inkhelh hnuhnung zawkah Tuikual South ten 64-60 in Chawnpui BC an hneh thung. Zarkawt BCA te match 6 khelah point 11 neiin table hmahruaitu an ni a, khelh 6 tho khel Tuikual South-in point 9 neiin palina an ni thung. 

Inkhelh hmasa zawka chak zolo zawk Mission Veng Hotshots hian khelh 6-ah point 9 nei tawhin Play In khel turin an dinhmun a tha rih a, Chawnpui BC erawh chak la nei lovin khelh 6-ah point 6 (MSL-a an point chhiar dan hi winner-in point 2, khelh hrim hrim (loser) in point 1 an hmu thin) chiah la neiin Play In khel turin beisei an nei tawh lo.

Inkhelh hmasa zawkah Mission Veng Hot shots ten inkhelh bul an tha tha hle a, Champion lai BCA pawhin an khel chhe hran lo, quarter khatnaah 22-21 in hma an hruai. Second quarter-ah erawh BCA lam chetha zawkin 25-20 hma an hruai ve thung. Quarter thumnah pawh BCA lam bawk chethain 26-22 in an la leh a, quarter tawp berah hian point 19 ve ve thungin an inhneh tawk. Hot shots tan foreigner Josua Aaron Keyes-a'n point 27 thunin Lalrozama'n point 20 a score bawk. Zarkawt BCA tan Matthew Remtluanga Sailo a khel tha a, point 25 thawkchhuakin an foreign player Joseph Allen chuan point 21 a score thung. 

Dar 8:30 inkhelah Play In luh beiseiawm tawh lo, Mizo hlanga khel Chawnpui tan Laltlanhlua leh Zodina Chawngthu point 14 ve ve an thun a, Tuikual South tan foreign player Darrell Bowiea'n point 19 thawk chhuakin Dennis Lalmuanpuia'n point 13 a score bawk. 

He inkhelhah hian zan dang zawng aiin team tawn tawnin an thun thei lo va, quarter khatnaah 16-13 a hmahruaiin quarter hnihnaah 17-15 in hma an hruai leh. Chawlhlawk hman zawhah Chawnpui lam rawn tang thar lehin quarter thumnaah 21-15 in hma an hrawn hruai ve thung a, mahse quarter tawp berah tang tlang zo lovin 11-16 in an tlawm leh. 

Nizan atang khan second match dar 8:00 pm tura fixture lo duanlawk tawh chu hun a chep deuh avangin thlak danglam a ni a, 8:30 pm ah tan a ni thin ang. 

                                               Total/ Period 1/ Period 2/ Period 3/ Period 4
MISSION VENG HOT SHOTS     : 83        22           20            22            19
ZARKAWT BCA                          : 91        21           25            26            19

                                                Total/ Period 1/ Period 2/ Period 3/ Period 4
CHAWNPUI BC                           : 60         13          15            21           11
TUIKUAL SOUTH BC                   : 64         16          17            15           16