Mizoram Super League khelh mekah hian team ruk an awm a, chung club paruk atang chuan play in khel tur point hmusang team li an thling ang. Inrinni zan inkhelah an vawi 4 khelhnaa point 6 hmutu Chanmari Vikings chuan khelh 5 khela point 7 nei mek Tuikual South chu 75-68-in an hneh. Play in khel tur team a la chiang thei rih lo. 

Tun dinhmunah chuan Zarkawt BCA chu Play In khel tura chiang tluk a ni thawh a, hneh la nei lo Chawnpui BC pawh Play in khel phak lo tura ngaih an ni tawh bawk. Hetihlai hian intluk tlang tak team dang pali te dinhmun erawh a la chiang lo vek thung. Khatla TBL, Mission Veng Hot Shots, Chanmari Vikings leh Tuikual South zing atang hian team khat an tlak ala ngai dawn a ni. 

Nizan inkhelhah hian Chanmari Vikings tan foreign player Raymond Edward Miller Jr a chetha a, point 28 a score a, an team tana thawhhlawk thin tual chhung player Michael F. Lalawmpuia, Moses Zoremmawia leh Lalhlunmawia te inkawpin point 35 an thawk chhuak bawk. Tuikual South BC tan an midum player Darrell Bowie a chetha leh hle a, point 29 a thun. Zan dang angin a team-mate ten an thlawp that tawk loh an tuar ve deuh a tih thei. 

First quarter-ah Tuikual South lam an che fuh hleithei lo. Chanmari Vikings lamin an khel tha a, an star player Raymond Edward Miller Jr chu mipuiin an lawm hle. Fans nei tha Tuikual South tan an star player Darrell Bowie-a pawhin a a thawhhlawk hle chungin 24-18 zetin Vikings lamin hma an hruai nghal. 

Second quarter khelh leh a ni a, Chanmari Vikings bawk a chungnung zawkah an ṭang. Point mamawh Tuikual South lamin hma an sawn thei lo 23-18 bawkin an tlawm leh. Chawlhlawk hmain Vikings lamin point 8 zetin hma an hruai a, chak tur chuan quarter hnih chhunga an lehthal ngei a ngai. 

Chawlhlawk zawhah quarter thumna an tan a, Tuikual South lam an rawn kang deuh a, Vikings lamin quarter hmasa an tluk lo. Quarter thumnaah hian team tawn tawnin point score an harsat a, 16-11 in Tuikual South lamin hnehna an chang ve thung. Point li chiahin an inthlau ta. Tuikual South fans lamin beiseina sang tak nen an pawl te an au phur a, fourth quarter-ah hian  hma an hruai chho nghal. Quarter hmasa ang bawkin team hnih ten basket an nei hleithei lo. Beisei loh zawk Vikings lamin rawn leh thalin 17-16 in quarter hnuhnung ber a tawp a, Chanmari Vikings lamin 75-68 in hnehna an chang ta zawk a ni.

                               Total/ Period 1/ Period 2/ Period 3/ Period 4

Chanmari Vikings :  75          24             23             11        17

Tuikual South BC :   68           18             18             16        16

Chanmari Vikings
Raymond Edward Miller Jr.- 28 pts - 17 rebounds 2 blocks - 2 assists - 2 steals.
Michael F. Lalawmpuia- 13 pts - 6 rebounds - 5 assists - 1 steal.
Moses Zoremmawia- 12 pts - 9 rebounds - 1 block - 3 assists - 5 steals.
Lalhlunmawia - 10 pts - 3 rebounds - 1 assist.

Tuikual South BC
Darrell Bowie- 29 pts - 19 rebounds - 4 blocks - 5 assists - 1 steal.
F. Zodinthara- 12 pts - 5 rebounds - 2 assists.
Dennis Lalmuanpuia- 8 pts - 3 rebounds - 1 assist - 4 steals.
Lalfakmawia- 7 pts - 10 rebounds - 6 assists - 3 steals.