Aizawl May 29, 2024 : Public Health Engineering Minister Prof. Lalnilawma chuan, "Tuilianin min sawisa nasa a, kan tui pump-na hmunhma leh khawlte engting chiahin nge a tihchhiat kan la hre thei mai lo a. Mipuiten kan harstna hi min hriatpui a, tui renchem turin ka ngen a ni," a ti.

Prof. Lalnilawma hian vawiin khan a pisa-ah PHE hotute leh chanchinbumi thenkhatte kawmin tunhnaia cyclone Remal in Aizawl khawpui tuilakna phase I,II leh phase III a tihchhiat dan te a sawifiah a. PHE hotute chuan Greater Aizawl Water Supply Scheme Phase I a electric motor, khawl leh diesel engine te chu tui in a chim bakah an bungrua engemaw zat chu tui leh hnawlin a chim vek tih an sawi a. Phase II ah pawh electric line a tihchhiat bakah phase III ah pawh an bungrua engemaw zat chirh leh tui in a chim niin an sawi a. Heng harsatnate hi chinfel tumin department lam chuan hma an la nghal tih an sawi a, engtiang chiahin nge an hmanrua leh khawl te hi a chhiat tih an la sawi thei lo niin an sawi bawk.

PHE hotute sawi danin tun tum hi kum 2017 hnua Tlawng tui a len lehna ber nia sawiin kum 2017 ai khan tui chim chin hi 1.5 metre in a sang niin an sawi bawk.