ZALEN March 9, 2026: Tuirial Hydel Project atanga Mizoram sawrkarin Kawlphetha (Power) a thlawn a dawn tawh zawng zawng zat anga lang chu 166.68 Million Unit (Upto Jan 2026) a tling a, heng Kawlphetha (power) sum hlut zawng chu Rs. Nuai 4300.209 ang vela chhut theih a ni a, amaherawhchu heng hi pawisa faiin Mizoram in a dawng tak tak lo.

Assembly session neih mek a, Lawngtlai West bialtu MLA C Ngunlianchunga zawhna P&E minister C Ngunlianchungan ziaka a chhan danin, Tuirial Hydro Power Station in kawlphetha a siam chhuah theih zat zel atanga 12% chu Free Power angin dawn zel thin a ni a. Chutihrualin, Tuirial atanga energy siamchhuah 88% leina man (Tariff) hi CERC (Tariff & Related Matters) Regulations 2019 leh 2024 hmanga chhut a nih vangin, 12% Free Power avang hian a dang 88% Energy kan leina man hi a to phah hlauh thung.

Single buyer nilo ilang chuan, free power bak 88% hi midangin an lei sak ve thei ang a, tichuan free power avanga a dang 88% leina hi Mizoram chauhin a pek a ngai dawn lo, mahse Power Purchase Agreement (PPA) ah Single buyer ni turin agreement kan sign pui tawh si avangin,free power avanga a manto phah ta 88% hi kan lei leh vek a ngaih tak avang hian, Free Power kan dawn atanga chhuta a pawisa zat hi chu, 88% kan leina ah kan pek leh vek tho a ngaih avangin, Single Buyer tan chuan Free Power dawn hi awmzia engmah a awm lo a ni.

#ZalenNews