ZALEN, Sept., 18, 2024: Tuirial-a Border Security Force (BSF)-in an luah mek leh Tuirial Airfield hlui chu Mizoramin ram pum huap infiamna inkhawmpui lian a thlen pawha dawl zo thei tura siam turin hma lak a ni dawn.

He hmun hi Nilaini khan Sports Minister Lalnghinglova Hmar-in tlawhin BSF Commandant Rakesh Panwar-an a lo dawngsawng a. Sipai ram luah lai hi zangnadawmna Rs. nuai 3.5 pein sports department-in tangkai zawka an hman atan hlan an tum a. Ram pum huap sports event thlen pawha dawl zo thei turin project siam dan turah hmalak tum a ni. 

Airfield runway protected area bulhnaia mi mal ram 35 leh in sate chu dan anga chhuahtira sawrkarin a lak let dan ngaihtuah ni se tih a ni a. Airfield leh a bul vela tourism department hmalaknaa Eco-adventure Circuit Swadesh Darshan hnuaia building sakte chu tangkai zawka hman dan tur dap ni tih a ni bawk.

Sports & Youth Services ram tur thlithlai hmunah hian BSF 38th Battalion an awm mek a, an awmna bik ram zau hi acre 3.19 (11.23 bigha)-a zau a ni. 

Minister Tetea hi Lalramsanga Sailo, Secretary, Sports & Youth Services Department; Henry C. Lalrawnkima, Secretary, Mizoram State Sports Council; John Tanpuia, Joint Secretary, Sports & Youth Services Department, C.Lalramsanga, Jt. Director, Sports & Youth Services, Lalngilneia Colney, Youth Welfare Office leh James Lalramnghaka, Asst. Engineer ten an tawiawm.