October 10, 2022; September ni 5, 2022 a Chhimtuipui lui a tla B. Rozamliana (28) s/o B. Lalhmingliana ruang chu a nawlpui a zawn tihtawp ni tawh mahse, mi tlawmngai thenkhatten an la zawn chhunzawm zel. September ni 26, 2022 tlaia Tuirini a tla  Joseph Lallianmawia (20), Zemabawk East ruang pawh vawiin thlengin chhung leh khat hnai leh thenrual tha thenkhat ten an la zawn chhunzawm zel bawk.

ZALEN thudawn danin, B. Rozamliana te chhungkua hi Tuipui Ferry a cheng niin, thla liam ta September ni 5, chawhma dar 11:30 vel khan an khua atanga Chhimtuipui lui hnar lam km 10 vela hlaah Speed boat hmanga balu la tura a thianpa nena an kal chu tuiah a chesual a, a nunna a chan a ni.

A ruang hi a chetsual ni tlai lam atanga zawn tan a ni a, Mizo dan anga ni 7 zawn a nih hnuah a nawlpui a zawn tihtawp a ni a, hemi hnu vawiin thlengin mi tlawmngai thenkhat ten a ruang an la zawn chhunzawm reng a, Chhimtuipui lui a len vangin chet vel erawh a la harsa hle nia thudawn a ni.

Hetihlai hian Tuirini luia tla Joseph Lallianmawia (20), Zemabawk East ruang pawh Mizo dan anga ni 7 zawn a nih hnuah hmuh a nih loh avangin a nawlpui a zawn tihtawp a ni tawh a, thenrual tha leh tlawmngai thenkhatte erawhin a tlakna Tuirini ah riahchilhin an la zawn chhunzawm mek zel nia thudawn a ni bawk.