ZALEN November 17, 2025: Khawruhlian VC, Sesawng VC I, VC II, VC III leh Sihphir Venghlun VC te chuan November ni 15, 2025, khan Tuirini kaia Forest Quarters ah Joint Meeting neiin an ram chhunga luidung leh nungchate humhalh dan tur chungchang an rél a, Joint YMA te hmalakna an thlawp tlat tih an sawi.

VC Joint Meeting chuan, Sesawng ram chhung, Khawruhlian leh Sihphir Venghlun ram chhunga nungchate leh luidung humhalh hi nasa zawka kalpui nise an ti a. A bik takin Tuirini leh Tuirial infinna atanga Mausinchhuah thleng hi humhalh bik nise, a tih bakah a tul anga hmalak chhoh zel nise a ti.

Tuirial leh Tuirini infinna chhak lam, Tuirini lui bikah Joint YMA ten an humhalh lai hi nasa zawka humhalh a nih theih nan Joint YMA te an thlawp tlat bakah a tul anga Joint YMA te hmalakpui tura an in huam thu an tarlang bawk.

Luidung nungcha humhalh chungchangah a hmala mektu YMA te chu Joint VC te hian a thlawp zel dawn a. An hnungah Joint VC te hi a ding zel dawn a ni, an ti.