Indian striker hlui, Jeje Lalpekhlua chuan a inkhelh chhungin tute mahin ‘a thiam’ tia an sawi ngai loh thu leh thu a awihna leh a thawhrimna vanga sang tak thleng thei chauh a nih thu a sawi.

India tana goal 23 lai thuntu, Jeje-a hian Inrinni tlai khan Ramhlun Indoor Stadium-ah Mizoram Badminton Association (MBA) buatsaih NEXA GIG Motors MBA Official Badminton Championship (Junior) 2024 kharna inkhawmah khuallian niin a hmanpui a, badminton khel mek Mizo naupangte a fuihnaah a tawnhriat leh a kalkawngte a sawi.

A vanglaia goal a thun theih em avanga ‘Mizo Sniper’ tia hming lem an phuahsak hial, Jeje-a chuan, “Ka inkhelh ve chhung khan kan coach te, mi dangte pawhin ‘a thiam’ tiin min sawi ngai lo. Thuawihna leh thawhrimna avang chauhvin Pathian zarah India tan vawi 56 lai khel thei ka ni,” a ti.

Football star a nih chhunga a rilru put hmang sawiin, “Keimahin tih tum dan leh khelh dan bik ka nei ngai lo, coach-ten ‘chutiang chuan i ti dawn nia,’ min tih ang khan ka khel mai a, thu ka awihna kha India team-a tel thei khawp ka nih chhan a ni,” a ti.

South Tuipui bialtu MLA chuan a thiam ber ber ni lo, a thawkrim leh taima zel an dingchang thin tih a sawi a, “A tawpah chuan thawhrimna bawk hi dingchanga hnehna min chantirtu a ni thin,” a ti.

India team-a a tel chhunga a tawnhriat a sawiah player tha ber ber a tih pahnihte chu talent nei tha hle mah se India tan an inlan rei lo niin a sawi a. “Kan practice zo tlai hun awlah ‘gym-ah kal teh ang’ han ti ila, a rukin a tih theih loh, an lo phu suau suau tawh zel a. Khatianga hun awlah pawh lo ti hram hram thinte kha a thiam ber ber an ni hlawm miah lo; mahse, thiam ka tih em emte aiin an thawhrimna avangin India team-a tel rei thei ber ber an ni,” a ti.

Mizo naupang, badminton khel mek, tun tournament-a champion zo lote pawh bei hram hram zel turin a fuih a. “Kei pawh kum 2006 khan Mizoram tana under 16 khel tura ka trial-naah ka tla a, a tirah chuan ka hnual ve tho. Mahse, ka bei zel a, a hnuah under 19 team-ah tlingin India tan thleng ka khel phak ta a ni,” a ti.

Mizo infiam mite chu thlen san deuhva eng emaw riauva inhriat mai an ching nia sawiin, “Thiam riau nia inhriatte hi tih loh tur, hmasawn zel a ngai. Kei pawh India tana ka khelh chhung khan ni tin hmasawn zel ka mamawh tho a ni,” tiin a sawi.

Kum 33 mi, Jeje-a hi Indian zinga Indian Super League (ISL)-a goal thun tam ber dawttu niin Chennaiyin FC tan phei chuan thun tam ber a ni a. 2014–15 khan I-League-ah Mohun Bagan a champion-pui hnuah kum 2015 khan ISL-ah Chennaiyin a champion-pui leh a, 2015–16 season phei hi chuan FPAI Indian Player of the Year leh AIFF Men’s Player of the Year Award dawng hial khawpin a che tha a ni.

Jeje-a hi hliamin a tihbuai avanga hun eng emaw chen a inkhelh theih loh hnuah February 16, 2023 khan inkhelh a chawlhsan thu a puang a. ZPM party zawm zuiin nikum kumtawpa Mizoram assembly inthlanah khan an khaw awmna, South Tuipui bial atangin MLA atan thlan tlin a ni zui ta a ni.

Tunah hian Mizo Sniper an tih thin hian ram mipui rawngbawl pahin badminton a khel ve thin a, tun kar chhunga MBA Official Badminton Tournament (Senior) a buatsaihah pawh a inlan ve dawn a ni.