Tun nipui transfer hian Erling Haaland chuan Borussia Dortmund atangin Manchester City a zawm ngei dawnin a lang a, tun kar chhung hian an inbiak rem hman beisei a ni. Borussia Dortmund star hi tun season-ah pawh a che tha leh hle a, Haaland hian Dortmund tana league game 121 a khelhah goal 92 a thun thei a ni.
 
BBC Sport tarlan danin Norwegian lei chhuak tur hian City hian £63 million an phal a, hemi chungchang hi Germany lamah an puan chian thuai rin a ni. City lam erawh chuan thil eng mah an sawi chiang duh rih lo thung. Manchester City CEO Ferran Soriano chuan Dortmund lam hotu Hans-Joachim Watzke-a hnenah Haaland-a release clause an chhiar zat pek an inhuam tih kar hmasa khan a hrilh tawh niin an sawi.  

He indawrna lian tak hi mimal ang chuan inbiak remna engmah a la awm loh thu sawi a ni naa, a thuphung chuan he transfer chungchang hi inremna neih a nih tawh thu an sawi thung. City lam hian an la sawi ri duh lo mai niin a lang. He transfer hi a hlawhtling hlauh a nih chuan tun nipui chhunga transfer lian ber pakhat a ni ang.

Sports agent hmingthang Mino Raiola pawh a thih hma khan he inbiaknaah hian a tel ve hman a, mahse a hmawr bawkna lamah chuan a tel ve hman dawn ta lo. City hian centre-forward mumal tel lovin a tum hnih nan Premier League title an hnaih leh tawh hle.

Nikum lam khan City hian Tottenham atangin Harry Kane lak luh ngei an tum a, mahse Spurs chairman Daniel Levy chuan an dilna a hnawl sak. Kane hian a contract zawh nan kum hnih a la nei a, release clause-a lei theih kum naupang zawk bawk Haaland-a lam an hawi ta zawk a nih hmel. 

Kum 21 mi hian Molde, Red Bull Salzburg leh Dortmund tam league game 121-ah inlan tawhin goal 92 zet a khung tawh bawk. Nikum khan Champions League-a gol 20 thun thei naupang ber a ni.