Khawvela footballer tha ber berte chuan Europe-a league sang pangaah an khel deuh vek a, continent zingah club football inelna sang leh ngaihhlut ber a ni a, club ropui tak tak awmin mimal anga hlawhtlinna ropui tak tak chang pawh an awm.

Squad chak tha tak nei tur chuan mipakhat thiam a tawk lo va, tlar hma ringawt that bik pawh a ni ber lo. Team tha tak din tur chuan position hrang hranga that rual leh inpumkhatna a pawimawh a ni.

Tun season chhunga Europe league sang panga zinga goal khung hnem trio panga chu i han thlir ila.

5. Robert Lewandowski, Ousmane Dembele leh Ansu Fati (Barcelona)
Barcelona hian hmatawng an nei tha hle a, winger lamah Ousmane Dembele, Ansu Fati, Raphinha leh Ferran Torres te an nei a, centre-forward Robert Lewandowski, Pierre-Emerick Aubameyang leh Memphis Depay te an nei bawk.

Lewandowski hian kumin nipui lai khan Camp Nou a zawma, a club tharah hian a goal khung thiam a theihnghilh lo tih lantirin goal a tun mawlh mawlh a, tun season chhungin inelna hrang hrang game 10-ah inlan tawhin goal 12 zet a khung tawh. 

Dembele leh Fati te pahnihin goal li dang contri ve bawkin an pathuam hian goal 16 an thun tling der tawh. 

4. Christopher Nkunku, Timo Werner leh Andre Silva (RB Leipzig) 
 RB Leipzig hian 2022-23 Bundesliga season bul an tan tha lo hle a, table-ah 11-na an ni mek. Tun thlengin match 8 an khelh tawhah point 11 chiah an la hmu. Leipzig hian league-ah goal 13 an khung tawh a, tun season-a German top-flight-a attacking record ṭha ber parukna a ni.

An hmatawng pathum Christopher Nkunku, Timo Werner leh Andre Silva te erawh an che chhe han lo va, an pathum thawhkhawm hian goal 19 zet an khung tawh thung. 

Nkunku hian tun season bikah goal 9 khung tawhin . Werner an goal 6 a nei tawh bakah Silva-a'n goal 4 a khung tawh bawk.

3. Leroy Sane, Jamal Musiala leh Sadio Mane (Bayern Munich)          

Bayern Munich-ah Robert Lewandowski a awm tawhlo chungin goal thun kawngah an la hniam chuang lo. Poland international tel lo hian an hmatawng pathumin goal 22 an khung der tawh. 

Leroy Sane, Jamal Musiala leh Sadio Mane te pathum che vel hi a hmuhnawm , an chetha tlang hle bawk. Sane hian season bul a tan tha a, goal 8 a nei tawh. Liverpool atanga zawm thar Mane-a'n player ṭha tak a nihzia a lantir mekin goal 7 a khung tawh a, Musiala pawhin goal 7 zet a khung tawh bawk. 

2. Erling Haaland, Phil Foden leh Julian Alvarez (Manchester City)        

Forward mumal nei lo pawha goal thun thei em em Manchester City chuan Erling Haaland an neih belh a, an hmachhawn team apiang lakah goal an surtir a niringawt mai. Norway international hian Manchester City a zawm hnuah Premier League bikah hattrick tum 3 a siam der tawh.

Haaland hian goal 19 zet a khung tawh a, a teammate-te lahin an thlawp tha a, Kevin De Bruyne leh Phil Foden te nen phei chuan inman tak an ni ringawt. Foden hian tun season chhungin goal 6 a khung tawh a, mi thar dang Julian Alvarez pawhin goal 4 a khung ve tawh bawk.

1. Neymar Jr., Lionel Messi leh Kylian Mbappe (Paris Saint-Germain) 
Neymar, Lionel Messi leh Kylian Mbappe te awmna club enkawl chu tu coach tan pawh rilru hah em em nachhan tur a tam lo ang. An pathum inkawp hi tunlai tlar hma hlauhawm ber tiin sawi mah ila hnialtu kan ngahin a rinawm loh. 

Mauricio Pochettino thlakin Christopher Galtier chu Paris Saint-Germain head coach thar a ni a, a hmatawng te an tha bawk a, tun thleng chuan an chetha rih hle. 

Season thar tan tirh lamah Neymar a chetha a goal 11 a khung tawh. Mbappe pawhin goal 11 nei ve tawhin Messi-a'n goal 8 a khung tawh bawk.