Tunge kan vote ang?

Admin - Feb 14, 2021

Tunge kan vote ang?

Naktip mai hian Mizoram khawpui ber Aizawl enkawltu, Aizawl Municipal Corporation-a roreltu tur councillor chu thlanna neih a ni dawn a, ward 19-ah inthlanna neih tur niin party pathum - Congress, MNF leh ZPM te chuan ward zawng zawng an chuh kim vek a, BJP ten ward thenkhatah candidate an nei ve bawk. Tun tum inthlan tur hi AMC-ah chuan a tum thumna tur a ni a, tute nge kan vote ang?

MP (Lok Sabha), MLA leh Local Council/Village Council-te hi Mizo mipuiten vote kan thlakna thin a ni a, Aizawl khawpuia chengte chuan AMC-ah vote kan thlak bawk thin. Heng inthlan hrang hrangah hian kan vote thlak dan kalphung hi a inang lo thin hle a, tualchhung inrelbawlnaa (VC/LC) vote kan thlak hi chuan party lam ngaihtuah lem loh hian veng tana tha tura ngaih leh hmelhriat thate vote hi tam tak tih phung a ni.

MP leh MLA-ah hi chuan tlem chuan party boruak hi a kal na hle thin a, rorel lai hi kum 10 an tlin meuh chuan paih thlak a ni deuh zel a, hemi atanga lang chiang em em chu neutral vote hian awmzia chu a nei thui hle tih a hriat theih awm e. AMC inthlan hmasak ber khan party pathumten councillor panga theuh neiin pakhatin councillor pali an nei a, loh theih lohvin sawrkar intawm siam a ni. A tum hnihnaah erawh MNF-in majority an la phak a, tun tumah hian mipui hian khawi lam hawiin nge vote kan thlak dawn le.

Vote kan thlak hian ngaihtuahna seng lem lova thlak ve ngawt a awm theih. Mi tha kan tih kan thlang thin nge, tling tura kan rin kan vote mai tih hi zawhna awm thei a ni. Kan ram rorel tur hi kan vote hmang hian kan thlan thin tih hi rilru a kan ngaihtuah a ngai a, vawkpui pawh rawn candidate se ka vote ang, tih ang rilru kha thui tak kan tlansan tawh chung hian, hemi ka vote hian tu rorelna hnuaiah nge kan awm dawn tih lam hi kan rilru put hmang ni se a tul tawh khawp mai. Engmah kan nih phah tak tak chuang lo, tih rilru pawh hi thlak a hun tawh, Ka hlawkna turin nge vote ka thlak thin Mizoram tan tih pawh hi kan inzawh nawn fo a tha. Ngaihtuahna fim taka vote thlak hi a tul a, Ka ramin hma a sawn theih nan kan vote hi kan ngai hlu hle tur a ni.

Share now