ZALEN May 1, 2025 : East Lungdar Village Council, All NGOs leh All Political Parties te chuan vawiin khan HSLC Examination 2026-a pakhatna Rachel Biakthapari, St. Joseph HSS chu Thangburha Hall, E. Lungdar-ah chawimawina an nei.

He chawimawna hun an buatsaih-ah hian Rachel-i pa, Salai Chan Uk chuan Rachel-i chu vawiin thlengin mobile phone a la neih loh thu a sawi a, "Phone kan neihtir lo, thuamhnaw lamin kan duat ngai lo a, hmawmsawm-in kan duat ngai lo bawk. Phone nei lovin tun thleng hian a awm a, chu chu a hlawhtlinna chhan ber pakhatah ka ngai. Hunawl kan neih tir ngai lo," tiin a sawi.

Rachel-i pa hming, Salai Chan Uk hi bangbo deuh an awm a, East Lungdar atanga ZALEN thudawnna chuan Rachel-i pa Salai Chan Uk hi Lai niin Khenglawt hnam a ni a, Rangoon University atanga BSc. a zawh hnuah 80's tawp lam khan East Lungdar High School zirtirtu atan lak a ni a, Chhiphir-a hun engemaw chen a thawh hnuah East Lungdar High School-ah headmaster-in a pension a nih thu a sawi.

Rachel-i pa hi a a lai-ah hming chu Salai Chanuk Khenglawt a ni a, a nu E. Lungdar mi V.Lallianmawii a ni. Rachel-i hi Class IX thleng East Lungdar-a lehkha zir a ni a, Class IX atangin St. Joseph HSS-ah hian a kal a ni.