Aizawl: Tunhnai ruahsurin Mizoram hmun hrang hranga thil a tihchhiat zat chu nuai 6000 chuang nia hriat niin chhiat tawkte chhawmdawlna tur sum hi sawrkar laipuiah dil mek a ni. Zalen palaiin Disaster Management & Rehabilitation Department thawktute hnen atanga thu a dawn danin May leh June thla chhunga ruahsur nasa avang khan Mizoram hmun hrang hrangah thi 13 an awm a, khua 215 tibuaiin in tihchhiat 848 awmin heng zinga 181 chu pucca building a ni a, a dang 667 hi kutcha in a ni. Chhinchhiah danin ruahsur vang hian in 104 chu nasa takin a chhia a, in chhe nel nual 1000 chuang a awm bawk. Ruahsur nasa vanga vanduaina hrang hrang thlengah mihring hliam 11 an awm a, ran - ar 102, vawk leh bawng 9 leh beram 5 an thi niin chhinchhiah a ni bawk. DM&R thawktute sawi danin ruahsur nasain thil a tihchhiat report hi a la lut reng a, hei vang hian tun a chhinchhiah ai hian a tihchhiat hi la tam zawk tur rin a nih thu an sawi. Tun hnai ruahsur nasain thil a tihchhiatte chhawmdawlna tur sum hi Disaster Management & Rehabilitation Department chu sawrkar laipui ah an buaipui mek a, a tul angin thuneitute an dawr mek niin Zalen chuan thu a dawng. Sawrkar laipuiin chhawmdawlna dan (sdrf norms) a siam ang chuan chhiattawh vanga thi te hnenah zangnadawmna nuai 4, in chhe vek ah Rs. 1,90,000 te pek theih a ni.