Bollywood star Tunisha Sharma chu December 24 khan a thi a, inawkhluma hmuh a nih avangin a thih dan hi chhui mek a ni. A ruang postmortem a nih hnuah vui a ni a, a vuinaah hian a bialpa Sheezan Khan-a nu leh farnu pawh an te. Sheezan erawh thu zawh fiah turin police custody-ah a awm mek.

Tunisha Sharma hi kum 20 mi chauh a la ni a, Bollywood-a hmabak nei eng tak a ni. A bialpa Sheezan Khan nen hian a thih hma ni 15 khan an inthen a, a thihnaah hian a bialpa hlui hi a inhnamhnawih em tih finfiah tumin hma an la mek a ni. Tunisha hi a rai niin an sawi a, mahse a ruang an postmortem result atangin a rai lo tih finfiah a ni. A ruang hi Pathianni khan postmortem a ni a, JJ Hospital-ah dah rih niin Thawhtanni khan a chhungte hnenah hlan a ni ang.

Tunisha Sharma hi Inrinni zing khan an series chan mek 'Ali Baba' shooting turin a inreport a, chawhnu dar 3 vela lunch break an neih laiin a bialpa Sheezan nen bathroom lam panin an kal. Sheezan hi a let leh a, mahse Tunisha hi a let ve mai tak loh avangin an zawng a, bathroom ah a lo inkhai an hmu ta a ni. Ama inawkhlum nge a bialpa hian a that tih hriat a ni lo a, finfiah tumin an bei mek a ni.

A thihna hian Bollywood-ah thawm a nei ring hle a, a thih chhan chhui chhuam ngei tura nawrna pawh a nasa hle a ni.