Tukin zing dar 6:30 atanin  fight event a in tan ang, he hunah hian tunlai boxing khawvel-a thawm nei ring pahnih Tyson Fury leh Deontay Wilder chuan WBC heavyweight champion  nih an inchuh dawn. An pahnih hi an in cho tawk hle a, tukin Las Vegas a T Mobile Arena-a an inhnek tur hi an tum thum inhnekna tur niin an inkar a chungnung zawk chinfelna hun a ni dawn a, tun tum an inhmachhawn bak hi chu an in hnek tawh kherin a rinawm loh. 

Hetiang a nih avang hian an thiamna leh theihna zawng zawng nen tha tawpin an tang ngeiin a rinawm a, tukin inhnek hi a nep lovang. Kum 2018 kum tawp khan Fury leh Wilder te hi a vawikhat nan an lo inhmachhawn tawh a, Fury hi a chetha zawk hle a, mahse, Wilder-a’n a hnek tluk avangin inhnehtawk anga puan an ni. Anni pahnih hi tawngkam hmangin an incho tawn reng a, nikum February ni 22 khan boxer pahnih te hi a vawihnih nan inhnek lehin British boxer Tyson Fury bawk chungnungin round sarihnaah technical knockout hmanga chakin Wilder a WBC title a chhuhsak. Wilder hian a title hi lak let leh ngei tumin a cho reng a, WBC title Fury-a’n a kawl tlat chu ngaingam lovin a tlawm hnu kar khatna lekah rematch clause a tinung nghal a, nikum July thla khan a trum thum nana inhnek leh turin ruahmanna an siam ta a, mahse Covid-19 hri leng vangin an inhnek thei ta lova, an inhnek hun tur an sawn hlat hnuah pawh tum khat chu an sawn hla leh tawh.

An inhnek tur a tlawlh fo vangin Fury hian Welder aiah hmanni lawka Oleksandr Usyk-a laka title pathum ngawt hlauhtu boxer ropui Anthony Joshua chu title unification bout neihpuiah a cho ta zawk a, mahse Wilder hi CAS-ah zualko-in a chak a, rematch nei turin court-in thutlukna siamin July thla kha ruahman a ni. Fury-a’n Covid-19 a kai vangin thulh a ngai leh tukin hian kan hmu thei dawn ta chauh a ni. Inpuahchahna hun thawl an nei bawk a, chungnung zawk tur sawi lawk ngawt theih a ni lo. Fury hi tum 30 inhnek tawhin a tumpui te lakah a la tlawm ngai lo va, boxer 29 a hneh zinga mi 21 phei chu knockout hmanga a hneh an ni. Boxer hnekna Wilder hian tum 44 a inhnek tawhah boxer 42 zet a tlawm tawh a, chung zinga mi 41 te chu knockout hmanga a hneh an ni.

Press conference an neihnaah Fury hian Welder chu a knockout tur thu leh chu tiang a thlen hmaa hmingchhe lutuk lova inthiar fihlim mai turin a chah a, Welder thung chuan a ropuina leh theihna tilang tura pen chhuak a nih thu a lo hrilh thung.