Tunlai footballer hmatawng tha zual 5

Admin - Nov 15, 2021

#1 Robert Lewandowski (Bayern Munich/Poland)

#5 Luis Suarez (Atletico Madrid/Uruguay)

Chuai lam pan tawha an ngaih Barcelona hnawl hnu Luis Suarez hian season liam ta khan a la tar lo tih khawvel hriattirin league-ah ringawr goal 21 zet a thun a ni. Ajax leh Liverpool-ah hming chherin ropui taka a khelh hnuah Suarez hian club ropui Barcelona a pan. Barca-ah hian game 283 khelin goal 195 zet a thun a ni. Tunah Atletico Madrid lamah kal leh tawhin kum 34 mi ni tawh mahse, striker hlauhawm ber zinga chhiar hmaih rual a la ni lo. 

Season liam ta khan league bikah goal 21 thunin Rojiblancos ten kum sarih chhung zet La Liga nomawi an chawi tawh loh chu a chawipui thei. Tun season-ah pawh chet that chhunzawmin goal 8 a thun leh der tawh.  Suarez hi club tan mai nilo, ram tan pawh a thawhhlawk hle a, tunah hian Uruguay tana goal thun tam ber record chelh mektu a ni. 

#4 Cristiano Ronaldo (Manchester United/Portugal)

Cristiano Ronaldo-a hming hi chu kan hre zingin a rinawm a, player ropui a nihnaah hian a hming sawi lan fo a ngai thin. A ram leh club tan kum 20 chuang zet a football career a chhawm nung thei ringawt pawh hi a ropui tawh tehreng nen, tunah khawvel striker tha zingah a hming a la lang phak ngat a ni. 

Ballon d'Or tum nga dawng thei ngat kha a ni a, amah hawtu thenkhatin an sawi hnawm deuh vang mai a, a ropuina hi nep tih ngawt chi a nilo. Kum 12 hnuah a club hlui Manchester United-ah lutin boruak nei lian ber a ni zui zat. United tan tun season-ah goal 9 a thun leh der tawh. Rnaldo hian Champions League bikah hian team hrang hrang 38 zetah goal a thun tawh a ni. 

Kum 36 mi Ronaldo hian season liam ta khan Paolo Rossi-a hming chawia goal thun tam ber award an siam thar Capocannoniere award hmasa ber chu goal 29 thunin Serie A lamah a dawng a, Euro 2020-ah tha taka khelin goal 5 a thun bakah assist a nei nual bawk a nih kha. Tunah 2021 Ballon d'Or award dawng thei tur mi 30 an thlan chhuah zingah a tel a, mahse, title ropui dawn a neih lem loh vangin, kumin chuan he award hlu hi chu a hum hawin a rinawm loh. 

3 Erling Haaland (Borussia Dortmund/Norway)
    Erling Haaland-a hi tunlai player naupang siah chuan striker hlauhawm ber pakhat a ni. Kum 2019-'20 khan UEFA Champions League a khelhna hmasa berah hat-trick hmangin a hming a rawn chher tan a. Tunah kum 21-na hmang mekin Earlier hian Champions League bikah goal 20 thun rang ber record siamin, goal 20 khung turin game 14 chiah a mamawh a ni. 

Borussia Dortmund star Erling Haaland hian UEFA Champions League-a Harry Kane-a record ding lai game 24-a goal 20 thun chu a khum chiang vai vai hle a, Harry Kane-a aiin goal 20 thun turin game 10 zetin a mamawh tlem zawk a. Hei hian Haaland-a ropui zia a tarlang rualin vannei satliah a ni lo tih a entir tel bawk awm e.

Norway international hian season liam ta chhung chauh khan a team Borussia Dortmund tan goal 41 zet a thun a, tun season pawh hian a inhliam zauh zauh chung pawhin a goal thun thiam a la theihnghilh lo tih a hriat a, season kal laiah hian goal 13 a thun leh der tawh. 

#2 Karim Benzema (Real Madrid/France)

Ballon d'Or award dawng tur zinga hming ri ring ber pawl Karim Benzema hi upa deuh tawh mahse, defender tana hmachhawn chakawm tak striker erawh a ni hauh lo. Kum 30 chuang tawh hmatawng hian tun season-ah ringawt goal 14 a thun leh der tawh.

Real hmatawng hian a club tan goal 300 a thun tling teuh tawh hle nghe nghe a. Amah aia hming chungnung leh langsar Cristiano Ronaldo-a nen an tlan dun lai khan a ropuina leh thiamna tam tak hliahkhuh sak a ni tih chiang taka lantirin Ronaldo-a'n kum 2018-a nupui laia Los Blancos a chhuahsan hnuah ringawt a club tan hian goal 101 zet a thun tling tawh a ni. 

Karim Benzema hian season 13 chhung teh meuh chu season tan tirh game 11 chhungin goal 10 ala thun tling ngei ngei a, hemi kawngah chuan Lionel Messi bak a hmaa ding tur player an awm bik lo. 

#1 Robert Lewandowski (Bayern Munich/Poland)

Robert Lewandowski hi tunlai footballer hmatawng zingah chuan striker hlauhawm ber tia sawi an tam khawp mai. Tun season-ah Bayern Munich hian goal 40 zet thun tawhin match tina goal 3.64 thun ziah ang an ni a, hemi kawnga sul-sutu langsar ber chu Lewandowski hi a ni.

Tunah kum 33 zet ni tawh mahse, tun season-ah ringawt goal 23 a thun leh der tawh a, a goal thun theih dan en hian a ropuina leh thatna hi sawi nep rual a ni lo. Kum sarih liamta khan Borussia Dortmund atanga free transfer-in tuna a club hi zawmin kum 7 chhungin a club tan goal 300 chuang a khung tawh a ni. 

Goal thun thei bik a nih zia lanna pakhat chu a game hnuhnung 100-ah Robert Lewandowski hian Bayern Munich tan goal 119 zet a khung thei. Europe league lian dang panga a top scorer te aiin a let 6-in goal a thun tam rih zawk a ni.  

Season liam ta khan Gerd Muller-a record chelh lai, season khat chhunga Bundesliga bika goal 40 thun chu khumin goal 41 a thun. Tin, Lewandowski hi Champions League bika goal 80 thun tura game khelh mamawh tlem ber a ni bawk. 

 

Share now