ZALEN September 21, 2025: Lunglei district-a Mamte leh Lungrang South-a sazu puang chu tûrin hrai tum a ni a, buh an seh chhiat a tam lo va, a vaiin tin khat hmun vel niin an sawi.

ZALEN-in Agriculture department thawktute hnen atanga thu a dawn danin sazu hian buh thar rang leh buhban lam an bei deuh a, buh tak erawh a la hmin loh avangin an khawih lo niin an sawi.

Heng khua leh a chhehvel khuaa sazu puang hi tûr hmang hrai tum an ni a, buhpui an seh loh nan inven lawk a ngaih avangin tûr hi pek tum an ni.

Khaw pahnih bakah a chhehvel khuate lo inring tur leh eng emaw a awm chuan District Agriculture Officer, Lunglei-ah report vat turin hriattir an ni.

Thudawn danin Mamte-ah hian chhungkaw 120 vel awmin 47-in thlawhhma an la a, tunlai hian thar rang chingtute lovah sazu puangin buhvui leh thlai thenkhat bakah bekang a seh a, lo zawng zawng vawi khatah bawh nghal lovin a tahtawlhin lo hrang hrangah an che zel niin an sawi.

Lungrang South khuaah hian chhungkaw 30-in thlawhhma lain pariat thlawhhmaah sazu hi a che a, tin ruk hmun vela zau buh vuite chu an seh chhe tawh.