'Twilight' sawi ruala rilrua lo lang chu Kristen Stewart leh Robert Pattinson te an ni a, Taylor Lautner leh Ashley Greene te mithlaah an cham nghal bawk. 'Twilight' saga hi tihchhuah a ni leh dawn a, a changtu hmasate erawh hmuh tur an awm kher tawh lo ang. 

He television series hi Stephenie Meyer lehkhabu ziah behchhana siam a ni a, en a hlawhin a lar thin hle. Series tharah pawh hian Meyer hi a puipa zingaha tel leh dawn a, a ngainatute tan chuan a nghahhlehawm tawh khawp ang le.   
Kum 49 mi American novelist Stephenie Meyer-i kutchhuak 'Twilight' novel hmasa ber hi 2005 khan tihchhuah a ni a,  hemi hnu hian - New Moon, Eclipse leh Breaking Dawn te tihchhuah leh niin, khawvel pumah copy maktaduai 100 chuang zet an hralh chhuak a ni. 

Film-a siam a nih pawh hian ngaihhlut a hlawh hle a, Kristen Stewart, Robert Pattinson leh Taylor Lautner te phei chuan an larpui vet vet hle. Tuna an buaipui leh tur hi an tihchhuah hun tur a la hriat loh a, a changtu tur pawh puan chian a la awm lo bawk.