India Prime Minister Narendra Modi chu kum 2022 chhunga Twitter-a huhang ngah leh thil tithei berah thlan a ni. He dinhmun luah tur hian Modi hian American singer Taylor Swift leh footballer lar Cristiano Ronaldo te a khum a ni. 

Social media research company Brandwatch chuan list hi an tichhuak a, kumin chhunga Twitter-a huhang ngah zual mi 50 an thlang chhuak. Hetah hian kum 72 mi Narendra Modi hian dinhmun sang ber a luah a, follower ngah ber erawh a ni hauh lo. Gujarat chief minister hlui Narendra Modi hian political news chauh a post lo a, thil chi hrang hrang thalai duh leh ngaihven zawng thlengin a post nasa hle a ni. 

Brandwatch hian influencer score hmangin tehna hi an kalpui a, post engagement an neih dan te, retweet leh reply an neih that dante pawh an teh a ni. 

Taylor Swift nek chhuaktu
Nikum lam kha chuan Taylor Swift a sang ber a, amah nek chhuaktu chu India politician chhuanvawr Narendra Modi a ni. An score zat erawh a inanga a, 100-ah 97 ve ve an score a ni. Politician zingah Barack Obama chu top 10-a lang ve awm chhun a ni a, ani hi 6-na a ni. Hillary Clinton chu 19 naah a rawn invawrh chho a, American politician leh activist ni bawk Alexandria Ocasio-Cortez chu list-ah hian a vawi khat nan langin, 37-na a ni. 

Elon Musk
Twitter a lei hnua thawm nei lian tak Elon Musk chu ranking-ah hian 3-na a ni a, 96 a score. Huhang ngah leh thil tithei ber ber zinga a tel hi a mak lo - nakkum lamah chuan ber nihna pawh a hauh thei hial tawh ang. Elon Musk hian Twitter-ah hian follower maktaduai 119.4 zet a nei a, top 3 zingah a ni aia follower ngah an awm lo. Narendra Modi chuan follower mtd 84.8 a nei a, Taylor Swift pawhin mtd 92 a nei. 

American singer Katy Perry chu 4-na a ni a, Ellen DeGeneres pawh top 5-ah a lang. Follower maktaduai 105.4 nei Cristiano Ronaldo chu 7-na a ni. Sumdawng hausa tawntaw Bill Gates Business, media personality Kim Kardashian leh Akiko Lawson te pawh top 10-ah hian an lang a ni. 

1. Narendra Modi Politician 84.8M 97
2. Taylor Swift Musician 92 97
3. Elon Musk Business 119.4 96
4. Katy Perry Musician 108.9M 108.9 96
5. Ellen DeGeneres Television host 76.9 95
6. Barack Obama Politician 133.2 95
7. Cristiano Ronaldo Sports 105.4 95
8. Bill Gates Business    61.2 95
9. Kim Kardashian Media personality 74.3 95
10. Akiko Lawson Media personality 7.3 95