Aizawl November 27, 2023 : Aizawl Two Wheeler Taxi Association chuan State Transport Authority (STA) phalna-in mipuite tana thil theihngilh hmuh zung zung anih nan leh mi tha lo tawn palha hnuchhui a awl zawk nan two wheeler khalhtute helmet hnung lamah ID number an tar thar a, helmet hnunga ID number tar hi November 2023 chhung hi chuan zawh fel hman an beisei.

ATTA thuchhuahin a tarlan danin mipuite chu engemaw palhah Two Wheeler Taxi hmang thin ten helmet a number chhinchhiah thin turin an ngen a. Member-te bio data hi ATTA Office lama an neih vek avangin passenger te'n rider number hi an chhinchhiah tawh chuan awlsam takin an inchhui chhuak zung zung thei dawn niin an sawi a, mipui te pawhin Two Wheeler Taxi an hmanin ATTA Member hman nachang hre turin an ngen a. Mipuite himna leh harsatna sutkianna tur atana thil tha nia an ngaih avangin hetiang hian an kalpui tih an tarlang a ni.

ZALEN in a kawmna ah Aizawl Two Wheeler Taxi Association President Lalhmunmawia chuan mipui atanga complaint a awm chuan chhuichhiangin a tul angin an bawhzui thin tih sawi bawkin, "Report a awm chuan kan member te hi office lamah kovin thil awmdan kan sawipui thin a. A then chu pawisa chawitir te, stand a ding thei lo tura hrem te leh suspend te pawh kan nei a. Kan member te an nih loh erawh chuan hmalak a har thin a ni," a ti bawk.

ATTA President Lalhmunmawia chuan an pawlah member 3200 vel inziaklut an awm nia sawiin taxi khalh zingah an member nilo 400 vel an awm bawk nia a hriat thu a sawi a. Aizawl khawpuiah AMC leh Local Council ten stand an pek 56 awm mekin din lailawkna hmun thenkhat a awm bawk niin a sawi bawk.

Aizawl Two Wheeler Taxi Association hian kum 2017 atang khan an member te ID card siamin an chanchin an chhinchhiah tan a, helmet hnung lama ID number tarlan hi November 2023 atang khan an kalpui tan a ni.