6.4.2022; Aizawl Traffic police chuan vawiin thlengin two wheeler taxi 'sticker' 2,994 an pe chhuak tawh a, member 2,600 bawr vel an awm mek.

Traffic police thawktute hnen atanga ZALEN thudawn danin, anmahni atanga sticker (A,B,C,D) la chhuak an la awm belh zel a, tun dinhmun a sticker la chhuakte hi nikum December thla a State Transport Authority (STA) in permit a pek te niin, hemi bak tunhnaiah permit pekchhuah thar a awm lo.

Aizawl Two Wheeler Taxi Association (ATTA) hruaitute sawi danin, tunhnaiah Aizawl Municipal Corporation (AMC) in Two wheeler taxi stand a siambelh sak a, stand an lo neih tawh sa nen tun dinhmunah taxi 200 bawr vel din theihna stand an nei tawh.

ATTA ruahmanna in mimal hmun parking atana manchawi a hman (hire), hmun 3 an nei a, chung zing a hmun 1, Zarkawt a an stand ah security an ruai. Mimal hmun an hmanna leh security an rawihna sum te, office an luahna te chu member fee an lak atanga intum an ni.