June 22; 2022; Aizawl traffic police ten vawiin thlenga two wheeler taxi sticker an pekchhuah tawh zat chu 3,259 a tling tawh a, tun dinhmun ah Aizawl Two Wheeler Taxi Association (ATTA) ah member 2,930 an awm mek.

Aizawl traffic office atanga ZALEN thudawn danin, two wheeler taxi te chu sticker (A,B,C,D,E) pek chhuah an ni a, sticker neih dan a zirin an tlan dan ruahman thin a ni. Hetihlai hian two wheeler taxi khalh zingah ATTA member ni lo engemawzah an awm a, tun thlenga ATTA member chu 2,930 an tling.

Vawiin khan ATTA chuan Vanapa hall-ah general body meeting vawi 4-na an nei a. He hun khuallian nia hmanpuitu Transport minister TJ Lalnuntluanga chuan, taxi driver te chu kan ram hmel lanna an nih thu te, driver-te chu kan ram economy siamtu pawimawh tak an nih thu leh ram hmasawn nan a hna pawimawh tak thawktu an nih thu a sawi.