Manchester United-in transfer an kalpui dan hi a mak angreng a, hun rei tak chhung player thar la lo va an chawlh hnuin a rual rualin an la leh lawi a. An manager inthlak sek vang te pawh a ni maithei e. Ten Hag-a hnuaiah hian mi thar an lut nualin a rinawm.

United hi an neitute inren vang nge an fimkhur zawk, transfer an tih dawn reng reng-in thu an pawtchat ve zung zung lo. Erik ten Hag-a hnuaiah pawh hian an player duhzawng la turin rei ngial an veh hnuah thutlukna thenkhat chu an siam chho tan a. Tun nipui transfer chhung hian Dutch mi pahnih Barcelona atangin Frenkie de Jong leh Feyenoord left-back Tyrell Malacia te chuan United an zawm thar dawn a, anni pahnih tel hian United first 11 in rem dawn chhin teh ang. 

Goalkeeper
Keeper-ah hi chuan David de Gea hian season bul a tan ngeiin a rinawm a, a aia thlan theih langsar ber Dean Henderson-a lah loan-in Nottingham Forest lamah a chhuak thuai dawn a, chuvangin Lee Grant leh Tom Heaton-a te hi chuan an nek chhuak zo lo turah ngai phawt ang. 

Centre-backs
United hi central defender thar lei tumin an inkau renga, tunah hi chuan thu tlukna siam a la awm chiah lo a ni maithei. Central defender-ah hian buai rukna an nei a, nghet chata chang thei tur player rinngam an awm chiah loh vangin an in start chhawk zauh zauhin a rinawm. Tunah rih chuan Harry Maguire leh Raphael Varane te hi duhthlan hmasak tur chu an ni rihin a rinawm. 

Full-backs
Diogo Dalot hi United right-back first-choice a ni mek a, tun season hian Aaron Wan-Bissaka hian a nek chhuak thei dawn em kan thlir ang. 

Vei lamah hian hun rei tak chhung Luke Shaw an hmang tawh thin a, Malacia a awm dawn takah chuan Ten Hag hian Malacia zawk hi a hmang zawk ngeiin a rinawm. Chuvangin he English defender hian season bul atangin starting line-up a luah phak a rinawm chiah loh. 

Midfield
De Jong an neih chuan, season hmasa aichuan field lai chu a phui deuhin a rinawm. Fernandes nen an ding dun thei ngat a nih chuan United midfield chu a danglam deuh ngeiin a rinawm. An hnung chiahah Fred a ding thei bawk ang a.

Ten Hag hian tlarhnung lam ven him a ngaipawimawhin a rinawm a, chuvangin defensive midfield-ah hian Fred hi a hmang lo a nih pawhin duhthlan tur dang Scott McTominay a la nei dawn tho. Bruno Fernandes pawhin a role ngai a chang thei ang. 

Attack
United hian club chhungah Cristiano Ronaldo nek chhuak zo tur central striker an nei lo. Season tharah pawh hian a hmatawngah an hmang leh ngeiin a rinawm. Jadon Sancho hi a tlan chakin ball a thiam a, tun season-ah chuan left wing chhawr rim ber tura ngaih a ni. Marcus Rashford chu awm tho mah se, ding lama tlan turah hian duhkhawp lohna a lian thin a, mithar an lalut thei a nih chuan an harsatna pakhat chu an sukiang tihna a ni ang. 

Ajax star Antony chu United line-up ti changtlung tura lakluh a ni maithei a, an puitlin ta lo a nih chuan Sancho leh Marcus Rashford te hi a sir lamah chuan chhawr rim ber tura ngaih an ni rih.