August 5, 2023; UAE-a Mizo domestic workers ten harsatna hrang hrang an tawh chungchangah leh tunlaia Mizo hmeichhe saruak/live sex video hluar ta lutuk chungchangah Mizoram State Women Commission (MSWC) chuan hmala in, chhui chiang turin DGP leh Aizawl DC hnenah lehkha an thehlut.

MSWC order a chhuah a tarlan a nih danin, tun hnai khan Social media hrang hrangah United Arab Emirates-a Mizo hmeichhia, hnathawk (housemaid) a kal te harsatna tawh dan te leh Placement Agency te chungchang a darh nasa hle.

He thil hi MSWC chuan a ngai thu tak hle a, ngun taka chhui zui ngai leh vil zui ngai niin a hria. Mizo hmeichhe tam takten sum leh pai hlawk zawka thawhchhuah theihna a nih beiseiin khawvel ram hrang hrangah hnathawk (housemaid) in an kal a, heng an hnathawhte hi social media atanga a lan dan anga a lo him lo emaw, an kal dan leh thawn chhuah an nih danah thil fel lo a lo awm emaw a nih chuan pawikhawihna lian tak, Human trafficking niin ngaih thu tak a ngai hle.

Hemi vang hian Mizo hmeichhia, khawvel hmun hrang hranga housemaid-a kal mek te chungchangah a tul dan anga rang taka chhui zui ngaite chhui zui tur te, United Arab Emirates-a thil thleng nia sawi, social media-a lo darh ta chungchang te nen hian lo chhui chiang tur leh he mi kaihhnawih dan bawhchhiatna awm thei hrang hrangte lo chhui turin MSWC chuan Director General of Police, Mizoram chu he order hmang hian a beisei a ni.

Deputy Commissioner, Aizawl District, Mizoram pawh he Suo Moto case kal lai mekah hian Opposite Party No. 6-ah dah thar a ni a, ram danga hnathawk tura Mizo hmeichhiate thawn chhuak thintu, Mizoram hmun hrang hranga Placement Agency awm te hi sawrkar laipui duh dan anga thil kalpui an nih leh nih loh te lo zirchiang a, an dinhmun dik tak hi rang taka lo chhui zui turin MSWC chuan Deputy Commissioner, Aizawl District, Mizoram chu a beisei bawk.

Instagram Account pakhat hmanga sex video viral thar chungchang hi lo chhui chiang tur leh he mi kaihhnawih dan bawhchhiatna awm thei hrang hrangte lo chhui a nih theih nan Mizoram State Commission for Women chuan Director General of Police, Mizoram chu he order hmang hian a beisei nghal bawk a. He order hmang hian FIR register a nih theih nan leh chak taka bawhzui a nih theih nana a tul ang anga hma lo la turin Director General of Police, Mizoram chu beisei a ni a, Mizo hmeichhiate pawh hetiang thil leh a kaihhnawih thleng thin hi tihtawp a nih theih nan mahni inthunun a, fimkhur taka nun hmang theuh turin MSWC chuan a beisei a ni.

Mizoram chhunga awmpui (housemaid) hrang hrangte dinhmun pawh zir chian ngai hle niin a hria a, an thawh phu zo tawk ngei tur pe theuh turin chhungkaw tin te a ngen bawk.