Manchester City manager Pep Guardiola chuan Champions League final lut zo lova an tla chu hlawhchhamna a nih loh thu a sawi. Semi-final second leg-ah minute 90 a nih thlengin City hian aggregate-ah 5-3 in Real Madrid lakah hma an hruai a, mahse extra time khel turin Real hian goal hnih lai an rawn thun leh thei a ni. Hun a tawp meuh chuan mual neitu lam Real hian 3-1 zetin an hneh let. Kum 6 chhung zet City a enkawl chhung hian Guardiola hian Champions League-ah ala champion pui thei lo a ni. 

Kum 51 mi Spanish coach chuan,"Tute emawin hlawhchhamna tia an sawi a nih pawhin kei chuan ka pawm ve lo," a ti. Coach a nih hnuah Guardiola hian kum 2009 leh 2011 khan Barcelona chu tum hnih lai Champions League-ah a lo champion pui tawh a ni. 

Guardiola hnuaiah City hian Premier League trophy tum thum an chawi tawh a, Europe-a an champion teuh ber tum chu season liam ta khan Champions League final-ah Chelsea 1-0 in an hneh lo a ni. 

"Squad a mite hian a harsat zia chu an hria, kan chak loh hi an pawm. Inhnialna chawchhuah kan tum lova, theihtawp chhuahin kan bei leh ang. Kan lungngai a dik, achhan chu kan hnaih ve tawh em a ni. Kan player te khan final khelh ngei an chak a, mahse Real Madrid khan khelh an phu zawk a ni," a ti.