Egyptian Salah hian kum 2017/18 Champions League final Kyiv khawpui-a Real Madrid nen an inhmachhawn tum kha a la theihnghilh lo tih a hriat a, khami tum khan Karim Benzema leh Gareth Bale te pahnih goal hmangin Los Blancos khan 3-1 in Liverpool an hneh a nih kha. Final zan kha Salah hian a theihnghilh mai tawh lovang. 

Hriatreng chhan tur pahnih a nei a, pakhat zawk chu UCL final-a an tlawm kha a ni a, pahnihnaah chuan first half-ah na taka a dar Sergio Ramos-a'n a hliam vang kha a ni. Kha a hliam vang khan hun rei tak inkhelh a chawlh phah nghe nghe. 

Mohamed Salah chuan Champions League final-ah Manchester City aiin Real Madrid a tum chak zawk thu BT Sport hrilhin Real Madrid a tum chak zawk chhan chu khing thil pahinh kan tarlan tak bakah hian City aia team nem deuh zawk an nih a rin vang niin Salah hian a sawi.

Thawhlehni zan khan Liverpool hian Villarreal hnehin final khel turin an inpet tling tawh a, May ni 28-a Paris khawpuia an khelh tur chinfelna hun zanin hian Real Madrid leh Manchester City ten an nei ang.

Salah chuan,"Dik tak chuan Manchester City hi team tha leh tough tak an ni a, tun season leh a hma pawhin kan hmachhawn fo tawh thin a ni. Mimal taka ka tum duh zawk mi zawt a nih chuan, Real Madrid hi ka thlang zawk ang. Anni hi UCL final-ah kan hneh lo tawh a, chuvangin ka hmachhawn leh chak a, hneh let ngei ka duh a ni," a ti.