ZALEN July 31, 2026 : UD&PA Department changtu Minister K. Sapdanga chuan vawiin khan AIR Complex, Tuikhuahtlang-ah All India Radio Aizawl din champha phak vawi 60-na (Diamond Jubilee) chu khuallian niin lungphum a hawng a. Jubilee puala Souvenir buatsaih chu tlangzarhin, Souvenir atana thu leh hla thawtute hnenah lawmthusawina thilpek a hlan nghal bawk.

All India Radio Aizawl Station hi kum 1966 July ni 31 khan Mizoram chu Assam State hnuaia District pakhat, Mizo Hills District a la nih laiin Tuikhuahtlangah din a ni a. Hetih hunlai ata vawiin thlengin All India Radio Aizawl chu mipuite rimawi hmanga awitu, hriat zauna chi hrang hrang hmanga chawmtu leh thuthar rin tlak tak tak fahtu a la ni chhunzawm ta zel a. A tirah chuan medium web transmitor Watt 150 chauhva pek chhuah niin, Security leh Media Service Chain anga ngaih theihin bul tan a ni a. 

Heta tang hian AIR Aizawl chuan hma a sawn zelin tun dinhmunah AIR Aizawl chhungah hian thawktu zathum chuang awmin, Broadcast Infrastructure & Network Development Scheme 2026 atanga 2030 thlenga kalpui tura ruahman hnuaiah, Ramchhung hmun dangte rualin Mizoramah pawh changtlung taka thuam chak leh tihhmasawn mek zel a ni.

Diamond Jubilee lawmna hi Pu D.R. Lalropuia, Director & Cluster-head, All India Radio Aizawl chuan kaihruaiin kalkhawmte lawmna thu leh AIR Aizawl chanchin tlangpuite a sawi a. AIR-a lo thawk tawhte leh Souvenir puala thu leh hla thawtute ai awhin Vanneihtluanga’n thu a sawi a. Hemi zawh hian chawimawina hun hman chhunzawm niin, Biakchungnunga, AD(P)/HOP chuan lawmthu sawiin hun hi a khar a ni.