ZALEN March 17, 2026 : Vawiin khan Aizawl Smart City Limited hmalaknaa din Durtlang Football Stadium chu Urban Development & Poverty Alleviation Minister K. Sapdanga’n a hawng. Hawnna inkhawm hi UD&PA Secretary Lalmalsawma Pachuau-in a kaihruai a, Aizawl North-1 bialtu MLA, PWD Minister ni bawk Vanlalhlana; Sports & Youth Services Minister Lalnghinglova Hmar leh Jeje Lalpekhlua, MLA bakah MFA hruaitute leh Durtlang khawtlang hruaitu ten an hmanpui.

UD&PA Minister K. Sapdanga chuan, 'He stadium saknaah hian sawrkar hmasate sulhnu chhuiin an hniakhnung kan zui a ni' tiin sawrkar kaltate a fak a; Mizorama Football khelmual tha ber hawn a ni thei ta chu lawmawm a tih thu sawiin, a panna kawng tur pawh ngaihtuah mek a nih thu a sawi a. Bawngkawn leh Durtlang inkarah kawng tha leh changkang tak, complete street design duan vek a nih tawh thu sawiin "sum pawhin min hmuak ran tawh a ni" a ti bawk. "Tun atanga kum 5 ah chuan mizo tlangvalte hian Delhi, Chennai, Mumbai-ah te leh National level inkhelhnaahte an pet goal fo tur a ni, chu chu kan beisei let dawn cheu a ni" tiin mizo thalaite chu he stadium hi lo hmang tangkai deuh deuh turin duhsakna a hlan nghal bawk a ni.

Sports Minister Lalnghinglova Hmar chuan Durtlang Football Stadium hawn thar chu Mizorama Football Stadium tha ber a nih thu sawiin, National Level mai ni lo, International level hialte pawh la khelh ni se tih chu an hmathlir a nih thu a sawi a. Sawkar hmasate hma lo lak tawhnaahte lawm thu sawiin, a sak puitlin tak tak nana sawrkar mai bakah MFA, contractor leh khawtlang hruaitute inpekna te, ASCL te hmalaknate chu lawmawm a tih thu a sawi a. Mizoram thalai tam tak ten eizawnna atana an hman mek, Football khelhna atan liau liaua stadium serhhran, Dedicated Football Stadium kan nei ta chu Mizoram tan mellung pawimawh tak a nih thu a sawi.

PWD Minister leh bialtu MLA ni bawk Vanlalhlana pawhin thu sawiin, Mizorama Football Stadium tha ber, International Standard sak hlawhtlin a nih theih nana thawktute zawng hnenah lawmthu a sawi a; International Standard Stadium panna kawng a la International Standard ve rih lo chu siam ve thuai a nih tur thu a sawi bawk.

Hun hmannaah hian ASCL Chief Executive Officer CC. Lalchhuangkima hnen atangin Technical Report ngaihthlak a ni a. Reprort-a tarlan a nih danin Durtlang Football Stadium sakna atan hian a pumpuiah ₹22,30,75,000/- sen niin, Smart City Mission, GoI atangin ₹20,07,67,500/- hmuh a ni a, Mizoram Sawrkarin ₹2,23,07,500/- a tum ve bawk a ni. A satu (contractor) atan hian M/s Biakliana & Sons te rawih an ni a. November ni 30, 2022 khan sak tan niin, March ni 9, 2026 khan sak zawh fel a ni a, vawiin hian mipui hman theih tura hawn a ni ta a ni. Field zau zawng ground area hi 110m x 68m niin FIFA Certified Artificial Grass pile height 60mm phah a ni bawk.

He Football Stadium-a thil awm chi hrang hrangte leh a dinhmun tlangpuite chu hetiang hi a ni:

1. Seating Capacity: 1257

2. Parking: 4-wheeler 50 leh 2-wheeler 90 park theihna

3. Entrance with lobby

4. Office, Reception

5. Ticket Counter and Admin Office

6. Conference Hall

7. Sports Equipment Room

8. Coach Room

9. Support Staff Room pahnih (2)

10. Team Dressing Room pali (4)

11. Players Washroom pahnih (2)

12. VIP Lounge AC and Toilet attached for Male & Female

13. Media Lounge with Toilet attached for Male & Female

14. Toilet Block (Male-2, Female-2, DA-2),

15. Match Official room

16. Medical Room

17. Electric Control Room

18. Security Cabin

19. Cafeteria

20. 2m Circulation area for spectators

Durtlang Football Stadium hi Field Management Committee, Durtlang Local Council Chairman-na hnuaia khawtlang hruaitu pawl hrang hrangte telna chuan an enkawlzui dawn a ni.