Aizawl; April ni 11, 2014-a MP leh MLA Bye-Election-an UDF candidate-te vote tute chungah lawmthu UDF chuan a sawi a. Tihthaihna leh sorkar chakna hmanga nasa taka beihna karah UDF candidate-te vote ngam an awm chu lawmawm an tih takzet thu eptu party hrang hrang intelkhawm, United Democratic Front (UDF) chuan thuchhuah siamin an sawi. MLA thlanna neih zawh hlima MP thlanna neih a nih a, Ruling Party leh Opposition-te tangrual inbeih a nihin, vote nuai chuang fe-in ruling an chak ziah a tih UDF thuchhuah chuan a sawi a. Kumin 2014-a inthlannaah hian, CL Ruala, Congress Party candidate-in vote 2,10,485 a hmu a, Robert Romawia Royte-in vote 2,04,332 a hmu a, an inthlauhna chu vote 6,153 chauh a ni tiin, Robert Romawia’n bial 19 laia hnehna a chang chu lawmawm an tih thu an sawi bawk. Tuichawng, Chakma Bial pakhata Congress-in UDF a hnehna (margin) chu 8,208 a tling tih tarlangin, mi thil thlir zau pha chin leh India ram politic inlumlet hre pha chin, NLUP-in a sal beh zawh loh te vote avangin UDF candidate chuan vote a hmuh san phah hle a ni, an ti a. Retheihna avanga vau beh theih leh duhnaa vote ngam lote chhanchhuak turin UDF chuan a thawk zel dawn a ni, an ti bawk. UDF chuan Postal Ballot-ah an candidate thlawpin sang taka hnehna a chan avangin sorkar hnathawkte chungah lawmthu an sawi bawk a. Hetih rual hian, vote 1,312 lai mai Postal Ballot thi a awm chu a buaipuitute fimkhur loh vang nia sawiin, tun hnu ah hetiang hi a thlen tawh loh nan fimkhur taka tih ni tawh se an duh thu te, Hrangturzo Bye-Election-a thlan tlin Lalawmpuii Chawng-thu leh MP-a thlan tlin CL Ruala te chu UDF chuan a lawmpui thu leh an mawhphurhna tha taka hlen chhuak turin duhsakna an hlan bawk a ni. UDF hian June ni 6-a MDC Bye-Election neih turah chuh vek a tum tih puangin, candidate siam chungchangah, a hmuna UDF Co-ordination Committee te thuneihna an hlan a. UDF thawhpui, NDA-in central-ah sorkar siam tura hneh taka chakna a chan avanga lawmawm an tih thu leh Zoram tan pawh malsawmna thlentu a nih ngei an beisei tih nimina an thuchhuahah hian an tarlang bawk.