Aizawl: Urban Development & Poverty Alleviation (UD&PA) department hotute chuan kawng indai dan na lirthei khalhtute kawhhmuhtu ‘cat’s eye’ an phum chu phum chhunzawm zel a nih dawn thu leh traffic police te nena chhunzawm a nih dawn thu an sawi. Cat’s Eye hi kawng daidanna lirthei khalhtute tana hmuh awlsamna tura kawng lai leh kawng sirah phum thin a ni a. Engin a chhun chuan reflector a awm avangin a eng thei a ni. Tunah hian Raj Bhavan chhim lam gate leh Bazar Bungkawn inkarah phum tawh a ni a. UD&PA chuan Traffic hotute nen inbiakna an neih mek thu sawiin line marking siam phawt a ngaih avangin tunah hian line mark-na tur traffic hotute nen an enho tawh niin an sawi a, a theih anga kawng lun lai leh kawng pengthuam awm tamnaah dah a nih dawn thu Zalen palai an hrilh.