Aizawl: Nimin khan UD&PA Minister Zodintluanga chuan khawpui chhunga cheng mi rethei mahnia chenna in din thei lote tana in sak tanpuina, Pradhan Mantri Awaas Yojana – Housing For All (Urban) chu CYLA Hall, Lawngtlai-ah a hawng. Zodintluanga chuan UD&PA Department chuan khawpui chhung hmasawnna mai bakah, mi retheite chawikan hna a thawh reng thu leh chumi atan chuan programme hrang hrang pawh duan a nih thu sawiin, chu’ng zinga sawrkar laipui programme pawimawh tak mai PMAY-HFA(U) Lawngtlai khawpuia hawn a ni thei tur chu lawmawm a tih thu a sawi a. PMAY in sak tanpuina chu a dawng tur dik tak chauhvin an dawn theih nan tan an lak tur thu sawiin, "Induhsak bikna a awm lo vang," a ti a. A vil zui hna pawh uluk taka kalpui a, holam taka hmangte chu an dawn tawh sa chhuhsak bakah, an la lak bak instalment dang pawh pek tawh loh tur a ni tiin, hlawhchham kan phal dawn lo, a ti. PMAY – Housing For All (Urban) hi thuang hnihin kalpui a ni dawn a. Tuna Lawngtlai khawpui tana hawn tak hi Beneficiary Led Individual House Construction niin, beneficiary-te chu Rs 1,50,000/- theuh pek an ni ang a, chu chu anmahni’n Rs 50,000/- in an lo do ve ang. Tanpuina hi instalment thum 40%, 40% & 20%-in pek tur a ni a. Lawngtlai khawpui chhunga 1st Phase atan hian beneficiary 500 thlan chhuah an ni. =======