UFC 274 chu tukin zing dar 7:30 hian Footprint Center, Phoenix khawpuiah neih a ni dawn a, main event  lightweight huangah contender pakhatna Justin Gaethje chuan champion lai Charles Oliveira a hmachhawn ang. 
 

Gaethje laka belt hum tumtu tur Oliveira hi tun hnai UFC fight-ah a tluang rih hle a, 'Do Bronx' hian a insualpui 10 zet chu a zawnin a hneh tawh. Tukin  fihna hautak a hmachhawn turah hian chakna a chang tluang chhunzawm zel thei a ngem? 
 

Gaethje thung hian a sualpui hnuhnung ber Michael Chandler chu a chai tawk hle a, a vanneiha siamin a chak hram thung. Chutih rualin, Conor McGregor tum hnih hneh tawhtu Gaethje hi fighter  nem a nilo tih kan hre vek awm e.
 

Justin Gaethje hi Lightweight division-ah chuan hnek na ber ti pawha sawi ngam niin Charles Oliveira thung hi submission thiam em em a ni thung a, UFC chanchina submission ngah ber a ni bawk. Tukin UFC hi Charles Oliveira atan a UFC fight 30-na chiah tur a ni a, fans tam tak chuan Gaethje hi a tukdawl theih ngei an ring. 

 Co-main event-ah pawh hian title inchuhna bout kan hmu dawn a, nula huaisen Rose Namajunas leh Carla Esparza te pahnih chuan kum 8 hnuah strawweight huangah rematch an nei dawn a, December 2014 an inhmachhawn tum khan Esparza a chak zawk a ni.

Title inchuh tur pahnih bakah hian lightweight huangah Michael Chandler leh Tony Ferguson te insual tur hi a nep dawn lova, veteran Donald Cerrone leh Joe Lauzon te inhmachhawn tur pawh an hmuhnawm ang.

Tunge chak dawn?

UFC-ah hi chuan chak zawk tur sawi lawk a har thin a, vanneih leh vanduai kar a hla em em a ni. Chutih rualin expert te rindan hi han tarlang dawn chhin teh ang. Main card a innuai tur Charles Oliveira hian Gaethje chu round thum chhungin a tuk zal hman an ring a, Michael Chandler pawhin a hmachhawn tur Tony Ferguson chu point hmanga a hneh an ring. Donald Cerrone pawhin Joe Lauzon a hneh dawn an ti bawk.

Preliminary card lamah Randy Brown leh Khaos Williams te inhmachhawn hi inhnehtawk hle tura ngaih nimah se Williams hi chungnung zawk turah an dah. Submission thiam tak  pahnih Brandon Royval leh Matt Schnell te insual turah Royval chu chetha leh chak zawk turah an ngai bawk.