Aizawl October 10, 2022 : ZPM Thalai chuan RTI zawhna chhanna an dawn atangin MNF sawrkârin Central atanga an sum hmuh atangin August 2, 2019 khan ui fing pariat an lei a, ui leina man, training pêkna senso leh an chaw leh damdawi man bâkah, an chênna tur in sakna chu cheng 18,40,000/- chuang a ni tawh tih thuchhuah an siamah an tarlang.

ZPM thalai chuan vawiin thleng hian Home department chuan chaw leh thildang mamawhah cheng nuai 4 chuang an sêng tawh an ti a. Narcotic detection dog-te hi Aizawl, Champhai leh Kolasib-ah te duty tirin, operation-ah an hruai thin niin chhanna an dawnah hian tarlang a ni bawk. 

Hetih lai hian, ui fingte hi lei an nih hnu, training pêk hnuah pawh, an duty naah vawiin thlengin ruihhlo chhuichhuah kawngah emaw thildangah emaw achievement chhinchhiahtlâk engmah an la neih loh thu RTI chhanna ah hian tarlan a ni bawk.

Chhawrna mumal awm leh si lova hetianga ui man tam lei a ni hi ZPM Thalai chuan pamhmai an ti a; sum tam tak luan ralna niin an hriat thu leh MNF sawrkâr hmasaka police mawza man tam leh ek in kal thei-te nen khan sum siamna leh thil thuhmunah an ngaih thu an tarlang. "Mizoram sawrkâr hi a enkawl thiam bâk thil buaipui tawh lo tur leh sum siamna niawma lang thilah inhambuai tawh lova, mipuite hlawkna tur leh ṭhatna tura chak taka hna thawk zawk turin kan ngen a ni," an ti.