Aizawl: Humane Society International chuan Zirtawpni kalta khan Ui zawrh tur 35 bakah an phurhna motor 3 an man a, Prevention of Cruely to Animals Act 1960 dan hmangin Bawngkawn Police Station-ah thubuai ziah luh nghal a ni. Humane Society International chuan ui sa ei chu dan kalh a ni tiin ran chunga ngilneihna lantir turin mipuite an sawm a. Ui phurh luh chu dan kalh nia sawiin ran reng reng state chhung a phurhluh dawnah Vety mithiam ten an check tur a ni a, mahse check lovin heng ui hi zan lamah check gate an paltlang niin an sawi.  Hetih lai hian uisa zuar pawl chuan an zawrh tur ui an man ngawt chu dan kalh a ni tiin court lamah an zualko ve thung nia thudawn a ni. Dan lova ui phur luhte hi Zirtawpni khan court-ah hruai nghal an ni a. Thubuai hi naktukah chhunzawm tur niin heng ui mankhawmte hi Humane Society International Mizoram chuan ui enkawlna tur hmun an  buatsaihah dahkhawm turin an ruahman a ni.